Эрдоган Орусия менен Украинага Кара деңиз боюнча эскертүү берилгенин айтты

Кара деңизде учкучсуз учак атып түшүрүлгөндөн кийин Түркиянын президенти Режеп Тайып Эрдоган Анкара Орусия менен Украинага деңизде кеме жүрүүсүнө коркунуч туудурган аракеттер боюнча эскертүү бергенин айтты.

"Акыркы өз ара кол салуулар Кара деңизде деңиз багыты үчүн олуттуу коркунуч жаратууда. Коммерциялык жана жарандык кемелерди бутага алган кол салуулар эч кимге пайда алып келбейт. Бул маселе боюнча эки тарапка тең ачык эскертүүлөрдү бердик", - деген ал.

Чет элдик басылмалар Эрдоган бул тууралуу Анкарада түрк дипломаттары катышкан иш-чарада билдиргенин жазышат.

Айта кетсек, кечээ, 15-декабрь күнү кечинде Түркиянын Коргоо министрлиги түрк аба күчтөрүнө таандык F-16 согуштук учактары Кара деңизден Түркиянын аба мейкиндигине жакындаган учкучсуз учакты атып түшүргөнүн жарыялаган.