Тажикстандын ТИМи Одинцоводогу мектеп окуучусунун өлүмү боюнча Орусиянын элчисин чакырды

Тажикстандын Тышкы иштер министрлиги Одинцоводогу 4-класстын окуучусу, Тажик жараны каза болгондон кийин улут аралык кастык негизиндеги кол салууну кескин айыптады.

Эскерте кетсек, каргашалуу окуя Орусиянын Подмосковье облусунун Одинцово районундагы Горки-2 айылындагы Успенск орто мектебинде орун алды. Анда Тимофей аттуу ошол эле мектептин окуучусу мектепке бычак менен барып, окуучуларга кол салды. Анда 4-классынын окуучусу Кобилжон Алиев каза тапты.

Тажикстандын ТИМи каза болгон баланын үй-бүлөсүнө жана жакындарына терең кайгыруусун билдирди. Окуяга байланыштуу Тажикстандагы Орусиянын элчиси Сергей Григорьев ТИМге чакыртылып, ага окуяны тез арада, объективдүү жана адилеттик менен иликтөө, ошондой эле күнөөлүүлөрдү мыйзам чегинде жоопко тартуу талабы менен нота тапшырды.

Ошондой эле Тажикстандын Орусиядагы элчилигине каза болгон окуучунун үй-бүлөсү менен туруктуу байланышта болуу жана бул маселени өзгөчө көзөмөлгө алуу тапшырмасы берилди.