Трамп Ак үйдө мурдагы президенттерге баа берилген такталарды орнотууну буйруду

АКШнын президенти Дональд Трамп Ак үйдө жайгашкан президенттер аллеясына мурдагы бардык мамлекет башчыларына арналган мемориалдык такталарды орнотууну тапшырды. Бул такталарда ар бир президенттин ишмердүүлүгүнө кыскача баа берилгенин чет элдик басылмалар жазышууда.

Маалым болгондой, АКШнын 46-президенти Жо Байденге арналган тактада ал "Америка тарыхындагы эң начар президент" деп мүнөздөлгөн.

Тактадагы текстте ал "Уйкучу Жо Байден" деген лакап ат менен аталып, АКШны "жок болуунун чегине алып келди" деп белгиленип, рекорддук деңгээлдеги инфляцияга өзгөчө басым жасалган.

Ошондой эле Байдендин расмий портретинин ордуна кол тамганы автоматтык түрдө коюучу аппараттын сүрөтү илинген. Бул кадам Республикалык партиянын өкүлдөрү тарабынан Байден мамлекеттик маанилүү документтерге өзү кол койбойт деген сын-пикирлерге шилтеме катары бааланууда.