Садыр Жапаров Япониянын императору Нарухитонун кабыл алуусунда болду

Бүгүн, 19-декабрда президент Садыр Жапаров Япониянын императору Нарухитонун кабыл алуусунда болду. Бул тууралуу мамлекет башчысынын маалымат кызматы билдирди.

Анда Кыргызстан менен Япониянын ортосундагы достук байланыштарды бекемдөө, маданий-гуманитардык кызматташтыкты өнүктүрүү, ошондой эле эки элдин ортосундагы өз ара түшүнүшүүнү жана ишенимди кеңейтүү маселелери талкууланды.

Император Нарухито мамлекет башчысын жылуу тосуп алып, анын сапары Кыргыз-Япон мамилелерин мындан ары тереңдетүү үчүн маанилүү экенин баса белгиледи.

Президент кыргыз эли достук мамиледеги япон элине карата чын ыкластуу жылуу сезимде экенин, анын маданиятын жана каада-салттарын жогору баалай турганын айтты. Ал Осака шаарындагы ЭКСПО-2025 бүткүл дүйнөлүк көргөзмөсүнүн ийгиликтүү өткөрүлгөнүн жогору баалап, Кыргызстандын улуттук павильонуна "Жашоо мүмкүнчүлүктөрүн кеңейтүү" категориясында алтын сыйлыктын ыйгарылышынын маанисин белгилеп өттү.

Президент Япониянын технологияларынын жана билим берүү программаларынын Кыргызстандын социалдык-экономикалык өнүгүүсүндөгү маанилүү ролун белгиледи. Ошондой эле мамлекеттик кызматкерлердин жаңы муунун калыптандырууга көмөктөшкөн Япониянын стипендиялык программасы өзгөчө белгиленди.

Мамлекет башчысы Кыргызстандын жаштарынын япон тилине жана маданиятына болгон кызыгуусу туруктуу өсүп жатканын, учурда өлкөнүн төрт жогорку окуу жайында 700гө жакын студент япон таануу жана япон тили боюнча билим алып жатышканын айтты.

Садыр Жапаров императордун суу ресурстары жаатындагы илимий ишмердүүлүгүн жогору баалап, тоолуу аймактарды туруктуу өнүктүрүү жаатында кызматташууну тереңдетүүгө кызыкдар экенин билдирди. Ошондой эле ал император Нарухитону 2027-жылы өтө турган "Бишкек+25" Экинчи глобалдык тоо саммитине катышууга чакырды.

Жолугушуунун соңунда Садыр Жапаров жылуу кабыл алгандыгы үчүн ыраазычылык билдирип, император Нарухитону өзүнө ыңгайлуу болгон убакта Кыргызстанга келип кетүүгө чакырды.