Чүй районунун акими кармалды

УКМК тараткан билдирүүгө ылайык, Чүй районунун акими Русланбек Тагаев кызмат абалынан кыянаттык менен пайдаланган деген шек менен кармалды.

Атайын кызмат шектүү 16-декабрда кармалганын тактады.

"Райондук мамлекеттик администрациянын башчысы Т.Р.Т. өкмөттүн 2019-жылдын 5-февралындагы №43 токтомунун талаптарын бузуп, 0,1 гектардан ашпаган аянттагы дарыянын нугунан кум-шагыл аралашмасын казып алууга лицензия берүүгө уруксат берген. Бирок иш жүзүндө 20 гектар жер тилкесин пайдаланууга уруксат бергени аныкталган.

Мындан тышкары, шектүү айрым чарбалык субъекттер менен кылмыштуу кутумга кирип, ошондой эле жакын тууганынын кызыкчылыктарын коргоо максатында өлкөнүн мыйзамдарын бузуу менен күбөлүктөрдү берүүгө уруксат берген",- деп билдирди мекеме.

Шектүү кармалып, УКМКнын убактылуу кармоочу жайына киргизилди.

Учурда УКМК бул ишке тиешеси бар башка адамдарды аныктоо боюнча кошумча тергөө жана ыкчам иш-чараларды жүргүзүп жатат.

Белгилей кетсек, Тагаев Чүй районунун акими болуп 2024-жылдын март айында дайындалган.