Өздөрүн укук коргоо органынын кызматкери катары тааныштырган шектүүлөр кармалышты

Бишкекте 100 миң доллар пара талап кылып, өздөрүн укук коргоо органынын кызматкери катары тааныштырган шектүүлөр кармалышты. Бул тууралуу 22-декабрда ИИМден маалымдашты.

Берилген маалыматка ылайык, Н.А. аттуу жаран милицияга кайрылып, өздөрүн укук коргоо кызматкери катары тааныштырган адамдар ишкерди "бизнести рейдерлик жол менен тартып алууга аракет кылгансың" деп айыптаганын билдирген. Ошону менен катар социалдык тармактарга ишкердин аброюна шек келтирген видео кайрылууну жайгаштыруу менен коркутушуп 100 миң доллар талап кылышканын айткан.

Аталган факт боюнча Кылмыш-жаза кодексинин 208-беренеси (опузалап талап кылуу) боюнча кылмыш иши козголгон.

Ыкчам иш-аракеттердин жүрүшүндө 1,5 миилион сом алып жаткан учурда Р.С. кармалды. Анын шериги А.К.нын үйүн тинтүүдө милициянын капитанынын жасалма күбөлүгү, куралга уруксат кагазы жана УКМКнын жетону табылган. Эки шектүү тең камакка алынып, тергөө жүрүүдө.