Санкт-Петербургда КМШ өлкөлөрүнүн башчыларынын бейформал жолугушуусу өттү

Бүгүн, 22-декабрда президент Садыр Жапаров Санкт-Петербург шаарында Көз карандысыз Мамлекеттер Шериктештигине мүчө-мамлекеттердин башчыларынын бейформал жолугушуусуна катышты.

Кыргызстандын президенти Садыр Жапаровду, Армениянын премьер-министри Никол Пашинянды, Беларустун лидери Александр Лукашенкону, Казакстандын башчысы Касым-Жомарт Токаевди, Тажикстандын президенти Эмомали Рахмонду, Түркмөнстандын башчысы Сердар Бердымухамедовду жана Өзбекстандын президенти Шавкат Мирзиёевди Орусиянын президенти Владимир Путин тосуп алды.

Мамлекет башчылары үчүн программанын башында Эрмитажда кыскача экскурсия уюштурулган. Александр жана Георгий залдары, ошондой эле айрым экспонаттар көрсөтүлдү.

Андан соң КМШ өлкөлөрүнүн лидерлери Эрмитаждын Георгий залына барышып, ал жерде бейформал жолугушуу өттү.

Жолугушууда лидерлер КМШ органдарынын ишмердүүлүгүнүн жыйынтыгын чыгарып, 2026-жылга негизги артыкчылыктуу багыттарды аныкташты.