Тармактык комитет саламаттык сактоо министри кызматына Досмамбетовдун талапкерлигин жактырды

Жогорку Кеңештин Эмгек, саламаттыкты сактоо, аялдар иштери жана социалдык маселелери боюнча комитети 23-декабрдагы жыйынында саламаттык сактоо министри кызматына Каныбек Досмамбетовдун талапкерлигин жактырды.

Эл өкүлдөрүнө талапкерди президенттин жана өкмөттүн Жогорку Кеңештеги өкүлү Алмасбек Абытов тааныштырды.

Жыйында комитет мүчөлөрү саламаттык сактоо тармагындагы бир катар актуалдуу маселелерге көңүл бурушту. Айрыкча медициналык кызматтардын сапатын жогорулатуу, калкты жеткиликтүү жана сапаттуу дары-дармектер менен камсыз кылуу, оорулардын алдын алуу, жаңы дарылоо мекемелерин куруу жана аларды заманбап медициналык жабдуулар менен камсыз кылуу зарылдыгы белгиленди.

Жыйынтыгында комитет мүчөлөрү Досмамбетовдун талапкерлигин колдоп беришти.

Айта кетсек, Досмамбетов 1-декабрда саламаттык сактоо министринин милдетин аткаруучу болуп дайындалган. Буга чейин ал УКМКнын Жалал-Абад облусундагы башкармалыгынын жетекчиси кызматын аркалаган.