Депутат мектептердеги ажатканаларды текшерүүнү сунуштады

Бүгүн, 23-декабрда Жогорку Кеңештин комитеттеринин биргелешкен жыйынында депутат Дастан Бекешев бардык мектептердеги ажатканаларды текшерүүнү сунуштады.

Айтымында, билим берүү мекемелериндеги ажатканалардын абалы талапка жооп бербейт.

"Мектептердеги ажатканалардын абалы начар. Окуучулар мындай шартта окубашы керек. Класска кирсең оңдоп-түзөөдөн өткөн. Ажатканага кирсең уяласың. Бардык мектептер боюнча текшерүү жүргүзүүнү суранам",- деди эл өкүлү.

Министрлер кабинетинин төрагасы Адылбек Касымалиев бул боюнча тийиштүү тапшырмалар берилип, текшерүү иштери жүргүзүлө турганын билдирди.

"Бул боюнча келерки жылы текшерүү кылабыз",- деди өкмөт башчы.

Белгилей кетсек, буга чейин Бишкектеги №37 мектептин окуучулары президент Садыр Жапаровго кайрылышып, мектептеги ажаткана оңдоого муктаж экенин билдиришкен. Анда окуучулар ажатканадагы терезелер ачык, кабиналардын эшиктери жок, раковинанын астынан суу токтобой агып турарын айтышкан. Көп өтпөй мэрия президентке кайрылган окуучулардын ажаткана маселеси боюнча билдирүү тараткан.