БШКнын төрагасы: "Жогорку Кеңеш тарбиялай турчу эмес, иштей турчу жер"

Борбордук шайлоо комиссиясынын төрагасы Тынчтыкбек Шайназаров Жогорку Кеңешке тажрыйбалуу гана адистер келиши керектигин билдирди. Мындай пикирин төрага "Кабар" агенттигине берген маегинде айткан.

Ал депутат болуу үчүн мамлекеттик кызматта 10 жыл эмгектенип, тажрыйба топтоо маанилүү экенин баса белгиледи.

"Тажрыйба болуш керек. Мамлекеттик кызматта 10 жыл иштеген, эл менен аралашкан адис депутат болсо болот. Кээ бир депутатка "сенин негизги милдетиң эмне?" деп суроо берсең, мыйзам чыгаруу дейт. Мыйзам деген эмне десең жооп бере алышпайт. Мыйзам деген мыйзам да дегендерин угуп, Конституцияны сураштан коркосуң. Жогорку Кеңеш тарбиялай турчу жер эмес да. Саясий жактан тарбиялайт, бирок ал жер үйрөнө турчу эмес, иштей турчу жер. Көрүп эле жатабыз беш жыл бою сүйлөбөгөн депутаттар бар. Ошондуктан эл шайлоого барып, сатылбаш керек", - деген ал.