УКМКнын кызматкерлерине жеке эс алуу жайы салынды (сүрөттөр)

Бүгүн, 23-декабрда Чүй облусунун Аламүдүн районуна караштуу Таш-Мойнок айыл аймагындагы УКМКнын “Кызыл-Белес” эс алуу комплексинин ачылыш аземи болуп өттү.

Аталган иш-чарага УКМК төрагасы Камчыбек Ташиев, Чүй облусунун жетекчиси Азамат Осмонов, УКМК ардагерлери жана өздүк курамы катышты.

“Кызыл-Белес” эс алуу борборунун жалпы аянты 19 гектар болуп, анда УКМК кызматкерлеринин эс алуусу үчүн керектүү заманбап шарттардын баары түзүлгөн. 15 заманбап эс алуу үйү курулуп, ар биринин аянты 60 чарчы метр. Мындан тышкары, асма жол 600 метрди түзөт. Кошумча көрктөндүрүү жана жарыктандыруу иштери да каралган.

УКМК төрагасы коопсуздук кызматкерлерин эс алуу комплексинин ачылыш аземи менен куттуктап, аталган жай алардын эс алуусуна ыңгайлуу экендигин, кызматкерлер жана ардагерлер кышкы-жайкы эс алуу күндөрүндө үй-бүлөсү менен таза абада чер жазып кетсе болорун баса белгиледи.

Иш-чаранын соңунда эс алуу жайынын кызыл тасмасы кесилип, комплекстин ичинде түзүлгөн шарттар тааныштырылды.