Мурдагы министр Бактияр Орозов бир жылга айдоочулук укуктан ажыратылды

Илим, жогорку билим берүү жана инновациялар министрлигинин мурдагы жетекчиси Бактияр Орозов бир жылга айдоочулук укуктан ажыратылды. Бул тууралуу Чүй облустук соту билдирди.

Билдирүүдө айтылгандай, Аламүдүн райондук сотунун чечими менен экс-министр Укук бузуулар кодексинин 193-беренесинин 1-бөлүгү боюнча күнөөлүү деп табылып, бир жылга айдоочулук укуктан ажыратылды.

Эске салсак, Бактияр Орозов 15-декабрда кызматтан алынган. Президенттин администрациясы тараткан маалыматта Орозов мамлекеттик жана муниципалдык кызматкерлердин этикасынын талаптарын сактабагандыгына байланыштуу кызматынан бошотулганы айтылат.

Ошол эле күнү социалдык тармактарда Бактияр Орозовго окшогон адам тартылган видео тараган. Анда анын наркология бөлүмүндө текшерүүдөн өтүп жатканын көрүүгө болот. Көп өтпөй эле Жол кыймылынын коопсуздугун камсыздоо башкы башкармалыгы Орозов мас абалында унаа башкарып бара жатканда кармалганын тастыктаган.