Чет элдик блогерге "жергиликтүү элди тарбиясыз" деген кыз коомчулуктан кечирим сурады (видео)

Интернет желесине "Өз элин шылдыңдады" деген аталыштагы видео тараган. Анда орусиялык блогерге кыргызстандык жаран маек куруп жатып жергиликтүү эл тарбиясыз экендигин билдирген. Бул көрүнүш коомчулукта нааразычылык жаратып, аны жазалоо керектиги байма-бай белгиленди.

Бул факт Бишкек ШИИББине катталып, анын негизинде тиешелүү текшерүү иши башталган.

Анын алкагында 1999-жылы туулган М.Э. аттуу жаран аныкталды. Ал тергөөгө жеткирилип, түшүндүрүү иштери жүргүзүлдү.

Ал коомчулуктан кечирим сурады.

Мындан тышкары айымдын аракеттерине укуктук баа берүү максатында соттук-лингвистикалык экспертиза дайындалды. Экспертизанын жыйынтыгынын негизинде тиешелүү юридикалык чечим кабыл алынат.

Милиция жарандарды коомдо пикир билдирүүдө мыйзам талаптарын сактоого, улуттук баалуулуктарга жана коомдук адеп-ахлак нормаларына сый-урмат менен мамиле кылууга чакырат.