Бишкекте Жол-кайгуул кызматынын инспекторун унаасында сүйрөп кеткен айдоочу бошотулду

1-февралда Бишкекте Жол-кайгуул кызматынын (ЖКК) кызматкерин унаанын капотунда сүйрөп барып таштай качкан айдоочуну Биринчи Май райондук соту эч жакка кетпөө тил каты менен эркиндикке чыгарды. Бул тууралуу бүгүн, 12-февралда SUPER.KG порталына ИИМдин басма сөз кызматынан билдиришти.

Маалыматка ылайык, учурда бул фактынын негизинде Кылмыш-жаза кодексинин “бейбаштык” беренеси боюнча кылмыш иши козголуп, тергөө амалдары жүрүп жатат.

Эске салсак, окуя 1-февралда Чүй проспекти менен Логвиненко көчөсүнүн кесилишинде катталып, анда ЖККнын кызматкери унаа токтотууга тыюу салынган жайда токтоп турган машинанын айдоочусуна кайрылган. Бирок айдоочу аны көз жаздымда калтырып, унааны айдап жөнөгөн. Жыйынтыгында унаанын капотунда сүйрөлүп барып жыгылган кызматкер ооруканага кайрылган. Ал эми кылмышка шектүү катары Бишкектин 40 жаштагы тургуну кармалып, камакка алынган.