Замир Мырза өз тагдырын чыгармасында чагылдырды

“Бир тууганым, эрмегим,

Жанымда болгун.

Ооматым болгун,

Бакытым болгун,

Апакемдин табериги, карындашым өзү...”

Замир Мырза дал ушундай саптардан турган “Ага-карындаш” деген ырына клип тарттырып, музыка сүйүүчүлөрүнө тартуулап отурат.

“Клиптин режиссёру - Эрнист Сыдыков. Ал эми чыгарманын сөзү, обону өзүмө таандык. Өз тагдырымдан алынган десем да болот. Анда бир туугандардын, ага менен карындаштын бактылуу балалыгы, апасынан айрылган кездери сүрөттөлөт. Клиптеги кичинекей кыз менен баланын ролун жакын туугандарбыздын балдары ойношту. Ал эми карындашымдын чоңойгон кезин Айжамал Кабылова, апамдын ролун Ош драма театрынын актрисасы Нургүл аткарды. 

Клипти 2013-жылдын октябрь айында эле тартып баштаганбыз. Орто жерден режиссёрдун жумушу чыгып, Айжамал үй-бүлөлүк шартына байланыштуу Москвага кетип, артка жылып кеткен эле. Минтип март айынын аягында бүтүрүп, элге тартуулап отурабыз. Клиптеги чоңойгон кезибиз Бишкектеги А.Малдыбаев атындагы Опера жана балет театрынан, бала чагыбыз Ош шаарынан тартылды",- дейт Замир Мырза жаңы чыгармасы тууралуу.