Израиль элчилиги өлкөнүн желегин айрыгандыгы үчүн Турсунбай Бакир уулун жоопкерчиликке тартууну талап кылууда

Израилдин Кыргызстан жана Казакстандагы элчиси Эли Тасман өлкөнүн желегин айрыгандыгы үчүн депутат Турсунбай Бакир уулун жоопкерчиликке тартууну талап кылып, Кыргызстандын Тышкы иштер министрлигине нота жөнөттү. Бул тууралуу бүгүн, 6-августта чет элдик маалымат булактары элчиликке шилтеме берүү менен жазып чыгышты. 

Элчилик депутаттын бул кылыгы биринчи ирет эмес экенин айтып, КРнын мыйзамына ылайык жоопкерчиликке тартууну талап кылууда. Ал эми министрликтин басма сөз кызматы менен байланышканыбызда учурда мекемеге мындай нота келбегендигин билдирди.

Эскерте кетсек, Турсунбай Бакир уулу 4-августта Бишкекте өткөн маалымат жыйынында "Израилдин желегин кагаздын ордуна дааратканага гана колдонууга болот" деп мамлекеттин желегин айрып салган жана аны жыйынга катышып жаткандарга ажатканага колдонууга бөлүп берген.