Белгилүү ишкер, “Аю холдингдин” негиздөөчүсү Шаршенбек Абдыкеримов убагында УКМКнын кызматкеринен жабыр тартканын айтып чыкты. Анын соцтармактагы баракчасына жазган посту талкуу жаратты.  

Абдыкеримов УКМКнын төрагасынын мурдагы орун басары, жакында камакка алынган Элдар Жакыпбеков анын бизнесине, өзүнө каршы иштерди жасаганын баяндаган. Ал беш жолу операция болгонун кошумчалаган.

– Өмүр менен өлүмдүн ортосунда жатканда баарын башкача көрө баштайт экенсиң. Мен көп учурда өзүмө ушул суроолорду бере берем: Булар кандай, кантип болду? Отуз жыл бою чоң бизнес куруу. Миңдеген адамдарды жумуш менен камсыз кылган бизнеске өтүү. Анан үч эле жылдын ичинде бүт баарын жоготуп, жалгыз калуу. Бизнесиңди, ден соолугуңду, үй-бүлөңдү жоготуу жана Лондондо жалгыз калуу...- деп жазат Абдыкеримов.

Ишкер оор учурда жанында эч ким жок өзү жалгыз калганын жазды.

– Досторуң жок, аялың жок, туугандарың жок, балдарың жок, жалгызсың! Бул 3 жыл мага адамдардын чыныгы жүзүн көрсөттү. Көп жылдар бою жанымда жүргөн адамдар дароо менин оорумдан пайдаланышты. Өлүм менен өмүрдүн ортосунда жатканымда алар мен ондогон жылдар бою курган оокат-баалуулуктарымды талап-тоной башташты. Алар мени “аман калбайт” деп ойлошту.  Досторум, туугандарым, ишенген адамдарым,- дейт Абдыкеримов.  

Айта кетсек, Шаршенбек Абдыкеримов 2023-жылы 8-сентябрда сыртынан камакка алынган. УКМК Абдыкеримовго таандык бир катар ири объекттер мамлекетке кайтарылганын маалымдаган.