12-13-мартта Ошто самбо боюнча Кыргызстандын чемпиондугу болуп өттү. Мындай мелдеш ордолуу Ош шаарында эгемендик жылдарынан бери биринчи жолу өтүп жатат. Бул саамалыкка соңку жылдары самбо боюнча Оштун командаларынын үстөмдүгү себеп болгон. Бишкекте өткөн буга чейинки таймаштарда экинчи борбордун өкүлдөрү лидерликти бербей келгенин эч ким тана албайт. Бул жолу да командалык эсепте 1-орунду «Мухаммед-Умар» клубу жеңип, кубок менен сыйланды. Экинчи жана үчүнчү орундарды да Оштун «Алыш» жана «Озгур» спорттук клубдары ээлешти. Ош кыргыз драма театрында өткөн мелдешке Бишкек, Чүй, Жалал-Абад жана Баткенден келген өкүлдөр катышты.