Ырчы жана актриса Гүлнур Асанова бизге берген маегинде устаты Роза Аманова менен АКШда жүрүп таарынышканын айтып, “ушакчылардын кебине ишенип, мени катуу капа кылды” деген эле. Экөөнүн жаңжалынын чоо-жайы бат эле угулду. Шакиртине жинденген Роза эжекебиз “чоңдордун колдоосуна таянып көөп кеттиң” кыязында Гүлнурду концерттин алдында катуу урушса, ал да сөздөн калбай, эжекесинин өткөнү тууралуу кеп айтып жиберген көрүнөт. Жаңжал Роза эженин Гүлнурду чала-була чаап жибергенине чейин барыптыр.
Устатына катуу кекенген белем, жаш ырчы Бишкекке келери менен Улуттук консерваториянын башчысы Муратбек Бегалиевге 6 барактан турган узун доо арызын жазып, устатынын үстүнөн арызданыптыр. “Муну жөн койбойм, тиешелүү жерлерге чейин арызданам” деп чамыныптыр. Муратбек ага консерваториянын мугалимдерин чогултту дейт, “экөөнүн чырын баскыла” деп. “Биз аралашпайбыз, өздөрү чечишсин дедик. Азыркы жаштар айныды, улуунун алдында унчукпай калуу деген жок” деп консерваториянын окутуучулары баш чайкашууда.
Ушунча адамды дүрбөлөңгө салганына караганда, ал жаш ырчынын таянган тоосу чын эле тээ Ак үй, Көк үйдө белем деген ой жаралбай койбойт экен, чиркин. “Устатынан шакирти озуптур” деген ушул да.