АЯЛЫН БЕНЗИН КУЮП ӨРТТӨП ЖИБЕРГЕН
1-июлда таңкы саат алтыда Кең-Суу айылынын С.Раимбеков аттуу 27 жаштагы тургуну 26 жаштагы аялы М.Султанованы бензин куюп өрттөп жиберген. Натыйжада М.Султанова денесинен 70 пайыз күйүк алып, Ысык-Көл облустук ооруканасынын реанимация бөлүмүнө жеткирилген.

БИЗНЕСМЕНДИ ТОНОГОН КАРАКЧЫЛАР КОЛГО ТҮШТҮ
27-майда болжол менен түнкү саат бирлерде борбордогу кичирайондордун бириндеги үйдүн подъездинен азиат түспөлүндөгү белгисиз 4 адам Бишкек шаарынын тургунуна кол салышкан. 30 жаштагы бизнесмен бул маалда автоунаасын токтотуп, үйүнө кирип бараткан. Электрошок менен куралданган кылмышкерлер эч нерсе түшүндүрбөй эле бир нече жолу ток урдурушкан да, мамлекеттик номери жок ак түстөгү автоунаага салып алышып Сокулук районуна караштуу Жал айылынын жанындагы талаага алып барышкан. Аны сабап, квартирасынын ачкычын алып үйүнө барышып, бардык баалуу буюмдарды, анын ичинде үй ээсинин бут кийимдерине чейин алып кетишкен. Андан кийин бизнесменди байлап талаага таштап, белгисиз тарапты көздөй зуу коюшкан.
Жабырлануучу 40 миң сомдук ноутбугунан, эки уюлдук телефонунан, акча каражаттарынан, эсебинде 300 доллары бар банк картасынан жана автоунаасынын, квартирасынын ачкычынан айрылган. Жакында милиция кызматкерлери тарабынан өткөрүлгөн операциянын натыйжасында бул каракчылыкка тиешеси бар деп шектелген үч жаран кармалды. Алар убактылуу кармоочу жайга киргизилип, төртүнчү кылмышкер изделүүдө.

БАҢГИЗАТ САТЫП БАЙЫЙМ ДЕДИ ЭЛЕ
3-июлда милиция кызматкерлери тарабынан Жалал-Абад облусуна караштуу Шамалды-Сай айылында “баңгизаттарын мыйзамсыз сактаган” деп шектелген адам кармалды. У. аттуу 55 жаштагы жергиликтүү тургунду 10 килограмм 500 грамм марихуана менен колго түшүрүшкөн. Бул факт боюнча Жалал-Абад ОИИБинин тергөө бөлүмү иликтөө иштерин жүргүзүүдө.

20 МИҢ БӨТӨЛКӨДӨН АШУУН ЖАСАЛМА АРАК ТАБЫЛДЫ
Спирт жана алкоголь продукцияларын чыгаруу, сактоо жана сатуу мамлекеттик агенттиги Мамлекеттик каржы полициясы менен биргеликте алынган оперативдүү маалыматты текшерип көрүшкөн. Мунун натыйжасында Балыкчы шаарындагы “Ынтымак” акционердик коомунун аймагынан жашыруун арак жасоочу цех табылган.
Цехтен этикеткасында “Araks” деген жазуусу бар 20 миңден ашуун бөтөлкө чыгып, тартылып алынган. Ошондой эле шек жараткан 12 миңден ашуун акциз маркасын, металл пробкалар, дозаторлор, ар кандай арактардын этикеткаларын жана сертификаттардын көчүрмөлөрүн табышкан. Бул факт боюнча кылмыш иши козголду.

9 АЙЛЫК НАРИСТЕ СУУГА АГЫП КЕТТИ
4-июлда болжол менен саат алтыда Жайыл районунун Малтабар айылында Чоң Чүй каналына автоунаа түшүп кеткен. Автоунаанын айдоочусу жана анын 4 жаштагы уулу аман калып, аялы ошол жерде каза болгон. Машинада алардын 9 айлык наристеси да болгон, бирок ал кырсыктан кийин автоунаанын ичинде жок болуп чыккан. Учурда куткаруу кызматынын кызматкерлери наристенин денесин издешүүдө.