Биздин редакциябызга Мирлан Туратбек уулу кайрылып: “Бишкектеги “Аманат тур” деген фирма атамды Москвага ишке орноштурабыз деп, сөзүнүн өтөсүнө чыкпай, азыр ал элчиликтин чатырында жашап жатат”,- деп арызданып келди. Анын айтымында, сыналгыда жүгүртүлгөн “Москвада иш” деген жарнама боюнча атасы тиешелүү дарекке барган. Аны кабыл алган “Аманат тур” фирмасы менен 15 миң сомго бааланган келишимге кол коюшат. Бирок Москвага баргандан кийин мурда айтылгандай курулуштагы жумушка эмес, талаага дыйканчылык кылуу үчүн алып барышыптыр. “Анын үстүнө атам менен барган топко ага чейин барган кишилер туткунда жүрүшкөнүн, документтерин кайтарып бербей жаткандыгын айтышат. Ошондо алар элчиликке келишип, азыр анын чатырында жашап, эптеп күн өткөрүшүүдө”,- деди атасына күйгөн Мирлан.
Айтмакчы, бул иш ачыкка чыга баштаганда биринчи топ менен кеткен 30дай кишинин онунун туугандары алар менен байланыша албай жаткандыгы белгилүү болду. Тиешелүү органдар бул маселени аягына чейин чыгарышат деп күтөбүз.