КЫЛМЫШКЕР БИР АЙДА ТАБЫЛДЫ
19-июнда таңкы саат 5те Сокулук айылынын 46 жаштагы М.С. аттуу тургунунун сабалып өлтүрүлгөн сөөгү өз үйүнөн табылган. Кылмышка шектүү делген жаран ушул жумада колго түшүрүлдү. Чүй ОИИБи жана Сокулук РИИБинин кызматкерлеринин изилдөө амалдарынын натыйжасында 19 жаштагы Ч.С. деген жаран кармалып, учурда убактылуу кармалуучу жайда.

МОСКВАДА КЫРГЫЗ КЫЗЫ ӨРТТӨЛДҮ
Москва шаарында 10-июлга караган түнү 19 жаштагы Бегимай Ахуновага үйүнүн подъездине кирип келе жаткан кезинде кол салынган. Аны атайын күтүп турган бет кап кийген белгисиз адам башынан ылдый бензин куюп өрттөп жиберген. Ага кошунасы Тилек Эркинулов жардам берип калган. Учурда Бегимай Склифосовский институтунда дарыланууда. Дарыгерлердин айтуусунда, анын абалы оор жана денесинин 35 пайызы күйүп калган.
Акыркы маалыматтарга таянсак, бул кылмышты жасаган адам ошол эле үйдө жашаган 21 жаштагы Азербайжандын жараны экендиги такталып, азыр ал Москванын ички иштер кызматкерлери тарабынан изделүүдө.

№3-АБАКТА МАССАЛЫК МУШТАШ БОЛДУ
Чүй облусунун Новопокровка айылындагы №3-абакта массалык мушташ болгондугу жөнүндө КРнын Мамлекеттик жазаларды аткаруу кызматынын басма сөз катчысы Жолдошбек Бусурманкулов билдирген. Анын айтуусу боюнча, 10-майда кечки 6лар чамасында абактагы бир топ экинчи топко кол салып, ур-токмокко алышкан.
Такталбаган маалыматтар боюнча, жаңжалга абактагылардын бирөөсүнүн аялы жөнүндө айтылган сөз себеп болгон. Бул иш боюнча кылмыш иши козголуп, учурда иликтөө жүрүүдө. Ошондой эле башка абактарда дагы мындай баш аламандыктардын алдын алуу иштери жүргүзүлүүдө.

СҮЙҮҮДӨН КЫЛМЫШКА БИР КАДАМ
Бишкек шаарында 18 жаштагы кызга анын подъездинен бычак менен кол салынгандыгы тууралуу ИИМдин басма сөз кызматы билдирет. Ал кызды коргоого аракет кылган анын атасы да шектүү тарабынан жеңил жаракат алган. Андан соң кол салуучу өзүнүн ден соолугуна залал келтирген. Кийинчерээк аныкталгандай, кол салуучу жабырлануучу кызды сүйгөн. Бирок ал жигит кыздын атасынан колун сурап, макулдугун ала албай ушундай кадамга барган. Кыздын атасынын каршы болушуна эки жаштын туугандык жагы бар экендиги себеп болгон. Бул кол салуу боюнча кылмыш иши козголду.

БИШКЕК-ТОРУГАРТ ЖОЛУНДА КЫРСЫК КАТТАЛДЫ
ИИМдин басма сөз кызматы билдиргендей, Бишкек-Торугарт жолунун 147-чакырымында 10-июль күнү саат 11лер чамасында жол кырсыгы катталды. Инфинити QX4 автоунаасынын 41 жаштагы айдоочусу Ш.Д. автоунаасын башкара албай калган. Аварияга туш болгон машинанын ичиндеги 81 жаштагы жүргүнчү Балыкчыдагы ооруканада көз жумган. Ал эми бул автокырсыктан каза болгон жүргүнчүнүн 69 жаштагы жубайы менен айдоочу жаракат алышкан эмес.

ӨРТ ЭКИ ӨМҮРДҮ АЛЫП КЕТТИ
Өзгөчө кырдаалдар министрлигинин басма сөз кызматынын маалыматына караганда, Чүй облусунун Кара-Балта шаарынын Жамбыл көчөсүндөгү №61-үйдө 12-июль түнү өрт чыккан. Түнкү саат 02:40та башталган бул өрттөн 2 адам каза болуп, 3 адам ар кандай даражадагы жараат алышкан. Өрттөн үйдүн 65 чарчы метри күйүп кеткен. Тилсиз жоонун чылым чегүүнүн этиятсыздыгынан келип чыккандыгы такталды.

Нурбек Абдыкадыров
koom@super.kg