Ушул күнгө чейин былтыркы парламенттик шайлоону үлгү деп айтышат. Бирок ошол эле учурда “соңку шайлоо укмуш таза эмес, добуш берүүчүлөрдү укмуштай чоң акчага сатып алды” дегендер да бар. Бирок кыскасын айтканда, Убактылуу өкмөт бардык саясий күчтөргө тең шартты түзүп берди. Анын ичинде шайлоо өнөктүгүн жүргүзүү учурунда бийликте тургандар кызматтарын тапшырышкан болчу.
Эми президенттик шайлоого карата биринчи кезекте өкмөт башчы Алмазбек Атамбаевди өткөн жылдагыдай эле ыйгарым укуктарын өткөрүп берүүгө чакырышууда. Анткени Баш мыйзамга ылайык, азыркы премьер-министрдин укугу керек болсо экс-президенттер Акаев жана Бакиевдикине салыштырмалуу эбегейсиз зор. “Президенттик шайлоо таза жана тең атаандаштыкта өтсүн! Жыйынтыгында эң татыктуу талапкер жеңишке жетет”,- деп “Ата Мекен” партиясынын Республикалык кеңешинин билдирүүсүндө жазылат.