Замир Мырза бир кезде “Танец под дождём” деген ыры менен популярдуулуктун туу чокусуна чыгып, кийин дайынсыз болуп кеткен эле. Буга ырчынын мугалимдик кесипти аркалап, андан соң үй-бүлө кургандыгы себеп болдубу?..

ЗАМИР ТУУРАЛУУ

• Көбүнчө капюшону бар кийимдерди киет.
• Улак тартышка түшкөнгө кызыгат.
• Грек-рим күрөшү менен машыгат.
• Ойногонду билбесе да, достор менен бильярдга көп барат. Тоонун чокусунда жалгыз отуруп эс алганды жактырат.
• Кошумча бизнеси жок, бирок өзүнө жеткидей байлыгы бар.
• Акыркы жолу 2009-жылы дискотекага барган. Клубга таптакыр барбайт.
• Алгачкы жолугушууга 7-классында барган. Сүйгөнүн күтүп жатканда кыздын атасы же агасы чыга калса, арыкка жата калып кутулчу.
• Карып кетпес үчүн дайыма диетада жүрөт. Кечки 8ден кийин тамак жебейт.
• Фобиясы – Жол кырсыгы.
• Биринчи жолу 11-класста “Махабат ыры” деген чыгарма менен чыккан.
• “Көп суммадагы акча качан кармагансың?” деген суроону көп алат. Буга “дайыма эле кармап жүрөм” деп жооп берет.

«ЧЫГАРМАЧЫЛЫК КРИЗИСКЕ КАБЫЛДЫМ»
– Акыркы убакта жаңы чыгармаларды биринин артынан бирин жаратып, угармандарды таң калтырып жатасың. Ага чейин дайының чыкпай калды эле, себебин билсек болобу?
– Чыгармачылыктагы ордум, стилим тууралуу ойлонуп, анализге салып жүргөн кезимде, чын эле, бул чөйрөдөн алыстай түштүм окшойт. Чыгармачылык кризиске кабылдым десем да болот. Ошондон уламбы, мугалимдик кесипке баш-отум менен ооп кетсемби деген ойдо да жүрдүм, бул бир жагы. Экинчи жагы, эл ырларымды жакшы кабыл албай, өзүмчө сыгылып да кеттим. Популярдуу болуп турган кезимде жайнаган досторумдун саны да азая түштү. Башка ырчыларды чайга чакырып, мени унутуп калгандар да болбой койгон жок. Бирок талант деген нерсе жөн жаткырбайт тура. Кайрадан бул чөйрөгө кайтып келип, жаңы чыгармалардын үстүндө иштеп, жакшы сын-пикирлерди уга баштадым. Бул мен үчүн стимул болууда.
– Чыгармачылыкка баш-отуң менен киришкени жатыпсың. Эмне, мугалимдик кесибиңди таштайсыңбы?
– Жок, таштабайм. Ал жактан тапкан акчам стабилдүү, берекелүү да. “Жигитке жетимиш өнөр аздык кылат” дегендей, бул кесибимди да чогуу алып кеткенге кудуретим жетет. Бирок чыгармачылыкты биринчи орунга коём.
– “ЖОЖдун мугалимдери сессия, окууга кабыл алуу учурунда бир жылдык кирешесин таап алышат” деп коюшат го. Сенчи?
– Мен пара деген нерседен алысмын. Ал эми көп эле абитуриенттерди окууга өткөздүм. Бирок буга атымдын таанымалдыгы, сөзүмдүн өткөнү эле көмөк болду.

«ЗАМИР МЫРЗА + ЖАҢЫЛ МЫРЗА»
– Өткөн жылы өлкөбүздө өткөөл мезгил болуп жатканда шашыла үйлөндүң...
– Нике кайып ошол күнгө буюруп калыптыр, 10-июнда келинчегим Жаңылды ала качып кеттим.
– Ала качып?..
– Ага чейин бир жылдай сүйлөшүп жүргөнбүз. Экөөбүз үйлөнүү тууралуу пландарыбызды бышырып койгонбуз. Бирок Жаңылдын апасы “коё тургула, дагы бир жыл күткүлө” деп калды. Сүйүүгө эч нерсе жолтоо кыла албайт экен. Экөөбүз сүйлөшүп, ала качуу планын иштеп чыкканбыз.
– Ачуу басарга келгенде кайындарың чыр чыгарган жокпу?
– Албетте, ала качуу салтына жарашкандай эле андай нерселер болду.
– Келинчегиң тууралуу айта кетсең...
– Келинчегим Алайдын сулууларынан. 21 жашта. Бишкекте чоңоюп-өскөн. Эки кыздын улуусу. Анын төрөлгөндүгү тууралуу күбөлүгүндөгү аты Жаңыл Мырза экен. Карабайсыздарбы, бул да Кудайдын буйругу окшойт, Замир Мырза + Жаңыл Мырза болуп калдык.
– Жаңылды кантип жактырып калдың?
– Эң биринчи эле чечкиндүүлүгү жакты. Өзүнүн оюн айтуудан тартынбайт. “Мен” деп турганы бар. Мына ушунусун баалайм.
– Кичинекейиңер чоңоюп калдыбы?
– Кызым эки жарым ай болуп калды. Атын коёрдо аябай издендик, мусулман динибизге туура келе турган атты таппай. Акыры Раяна деген ысымга токтолдук. Бул “бейиштин ачкычы” дегенди түшүндүрөт экен. Негизи, көбүнчө мырзалар биринчи уулдуу болууну кыялданышат го. Ал эми мен кыздуу болгум келчү. Негизи эле кыз бала назик, ата-энеге кайрымдуу келет. Келинчегим кош бойлуу кезинде да УЗИден алдын ала билүүдөн баш тарткам. Учурда бактылуу ата болуп, кызымды колумдан түшүрбөйм.
– Кимиңер көбүнчө кызганчааксыңар?
– Эркекте кызганчаактык сапат болуш керек. Мен Жаңылды кызганчудай ал көчөгө деле чыкпайт, бала менен үйдө эле отурат. Ал эми жубайым кызганганын деле билдирбейт. Клиптерде кыздар менен кучакташып деле жүрбөймүнбү. Баарына түшүнүү менен карайт.
– Жакшы. Ал эми үйдө ким кожоюн?
– Албетте, мен. Бүт нерсени өзүм чечем. Учурда борборго көчүп келүүнү пландап жатам. Анткени бул жакта чыгармачылыкты өркүндөтүүгө бардык шарттар бар да. Жер тилкесин алып койгом. Азыр үй салууга чамынып жаткан учурум.

«АТАМДЫ КЫЗГАНЫП, ҮЙДӨН КАЧЫП КЕТКЕМ»
– Экөөбүз маектешерден мурда “жашоомдо жүрөктү өйүгөн нерселер көп болгон” деп сөз баштадың эле. Жан дүйнөң тууралуу сүйлөшпөйлүбү...
– Негизи, Жараткан пендесине ачууну да, таттууну да ыроолойт экен. Мен эки жолу абдан мүңкүрөп кейидим. Бул жашоодо кейигеним, алтын апамдан эрте айрылганым. Жети жашымда апа мээриминен ажырадым. Анан атам башкага үйлөндү. Бул жашоодо апаңдын ордун эч нерсе толуктай албайт экен. Атамды экинчи апамдан кызганып, ыйлап, таарынып үйдөн качып кеткен күндөрүм да болгон. Негизи, каникул болору менен эле чоң атамдыкына, таятамдыкына айылга жөнөчүмүн. Ошол учурда шаар негедир мага суз, жаман көрүнчү. Айылдан таптакыр кетким келчү эмес. Атам алып кеткени келгенде жүгөрүнүн арасында анын кетишин күтүп жашынып жата берчүмүн. Ал аргасыздан “мейли, дагы бир аз кала турсун” деп кетип калчу. Ошентип, сабакты да көп калтырдым. Бирок сабактарды көп калтырганым менен, мектепти алтын медаль менен аяктагам.
Андан соң апа мээримин берген чоң энем кайтыш болгондо мүңкүрөп, бул жашоодон шамым өчүп калгандай эле болгон. Бирок убакыт баарын дарылайт деген туура окшойт. Жашоо өз нугунда өтө берет экен.
– Эмнеден кубат аласың?
– Чыгармаларымды эл баалап, жакшы пикир айтышса.

Бахияна Сатылганова
star@super.kg