Саясатчылар үй-бүлөсүн коомчулуктан оолак тутушат. Анын үстүнө элдин алдында алардын өзүн кандай алып жүргөнүн билгенибиз менен, өз үйүндө кандай киши экендигинен кабарыбыз жок. Каарманыбыз Ай-Данэктин оозунан атасы жөнүндө көптөгөн кызыктуу сөз уктук.

Рокту жактырган Дани
Ай-Данэк, Өмүрбек Текебаевдин улуу кызы.
1996-жылы 29-июнда төрөлгөн.
Амантур, Эсентур деген инилери жана 3 жаштагы Айсара аттуу сиңдиси бар.
Үйдөгүлөр аны «Дани» деп чакырышат.
Апасы кызынын табитин, ал тургай кандай кийим жагарын жатка билет.
Рок, хип-хоп, поп багытындагы музыканы угууну жактырат.
Селена Гомес менен Жастин Бибердин ашынган күйөрманы.

Адатта, өспүрүмдөр оор мүнөздүү келишет. Кантсе да өткөөл курак демекчи, алардын өзүн алып жүрүшү, тандоосу, керек болсо сөзү да заматта кубулуп турат. Бирок менин алдымда жоош, уялчаак жана тарбиялуу кыз отурду. Кабинетке кирерим менен ордунан тура калып, башын ийкеп учурашканын жылуу кабыл алдым. Бардык эле өспүрүмдөр сыяктуу уюлдук телефонунан музыка жаңырып, көк көйнөк кийген Ай-Данэк менен болгон маегибиз эркин баарлашуудан башталды.

– Алгач таанышып алсак, кандай дейсиң?
– Албетте. Бул менин биринчи интервьюм болуп жатат. Атым – Ай-Данэк. Быйыл 10-класска көчүп жатам, жашым 15те.
– Азыр эс алуу. Сен эмне менен алек болуп жатасың?
– Атам менен апам жумушта. Инилерим Жалал-Абадга, чоң энемдикине кетишкен. Мен дагы Жалал-Абадга барганды жакшы көрөм. Чоң энем бизге жумуш деле жасатпайт. Бирок мен короодогу гүлдөрдү сугарып берем. Азыр болсо Айсараны карап үйдө отурам. Аны менен сейил бактарды кыдырып, кээде курбуларым менен киного барам.
– Өзүң эмнеге кызыгасың? Кандай хоббилериң бар?
– Мен жашоомду музыкасыз элестете албайм. Башка адамдар “сенин үнүң жок” деп айтышса деле, ырдаганды аябай жакшы көрөм. Ашканада тамак жасасам да, үйдү жыйнаштырып жүрсөм да, бардык жерде ырдап жүрө берем.
Мурда бийге катышчумун. Анан Ассоль Молдокматованын кыздар үчүн арналган мектебине бардым. Ал жерден өзүн алып жүрүү боюнча тарбиялык кеңештерди уктум.
– Өспүрүм кыздар сериалдарды да жакшы көрүшөт. Сенчи?
– Мен көбүнчө ошол сериалдардын китебин окуганды жакшы көрөм. Азыр популярдуу болуп жаткан “Вампирдин күндөлүгүн” окуп жатам. Тасмага салыштырмалуу китеп көбүрөөк эргүү берет. “Күүгүмдүн” беш китебин кууп жүрүп окуп чыктым. Жакында Сидни Шелдондун “Сен караңгыдан коркосуңбу?” деген чыгармасын окуп бүтүп, ага аябай таасирленип калдым. Режиссёрлор бул китепти байкабай жатышкан чыгар, анткени эгерде аны тасма кылып тартышса, эң кызыктуу болуп чыкмак.
Негизи детектив жанрындагы чыгармалар кызыктырат. Эмнегедир мурун курбу кыздарым корей сериалдарын айтып калышса, жактырчу эмесмин. Бирок “Сен кереметсиң” деген сериалды көрүп калып, мен дагы бул сериалдарды жактыра баштадым. “Мыкты жигиттерди” көргүм келбейт, анткени кыздарга окшоп “Гу Чжун Пё” же “менин Ким Бомум” деп ооруп калуудан корком.
– Үйдүн эң улуусу болсоң, апаңа кандай жардам бересиң?
– Өткөндө апам бир туугандарым менен бир жакка кетти. Алар келгиче үйдө атам экөөбүз калдык. Күндүз атамдын жумушуна келип, айрым кагаздарын жайгаштырууга жардам берип жүрдүм. Кечинде кесме жана куурдак бышырдым. Кичине эле кемчиликтерин айтпаса, кыскасы, атама жакты.
– Атаң силерге жетиш­түү убакыт бөлө алабы?
– Жумушуна байланыштуу анын убактысы аздай сезилиши мүмкүн. Бирок ал бизге сөзсүз өзүнчө убакыт табат. Күндүз жумушта болгонуна карабастан, билип туруу үчүн үйгө чалат. Кечинде жумуштан келгенде алтообуз тең отуруп алып чогуу тамактанабыз, анан кино көрөбүз.
– Сабактарыңа көп көңүл бурса керек...
– Албетте. Атам физика мугалими болуп иштеген. Ошондуктан алгебра жана физика сабагынан түшүнбөй калган жеримди көп сурайм. Өзүм англис тил сабагын жакшы көрөм.
– Саясатчы кишилер сыртынан сүрдүү көрүнүшөт го. Атаңа кандай мүнөздөмө бере аласың?
– Ак көңүл, боорукер, адилеттүү, сөзүнө туруктуу, мм... дагы аябай күлкүлүү. Сырттагы адамдарга байкалбаса керек, бирок үйдө бизге анекдот айтып берип, баарыбыздын боорубузду эзип салат.
– Кайсы анекдотту көп айтып берет?
– Айтып берейинби? Чукча аялын урушуп жатат. Столду катуу-катуу койгулап: “Сенин мээң жок!”- дейт. Анда аялы: “Ой, эшикти бирөө каккылап жатат окшойт”,- деп калат. Күйөөсү болсо: “Отур, мен өзүм ачып келем”,- деген экен.
Муну атам укмуштай актёрдук менен берилип аткарып берет. Канча уксак да тажабайбыз, тескерисинче, барган сайын күлкүлүү угулат.
– Атаңа кайсы жакта­рың окшош?
– Экөөбүз тең аябай өжөрбүз, айткан сөзүбүздү бербейбиз. Сабырдуу эмеспиз. Аз болсо да, пессимисттик жагыбыз бар. Дагы атам экөөбүздүн көп буюмдарыбыз окшош. Мисалы, iPad (планшет түрүндөгү компьютер). Анан палоо менен мантыны жакшы көрөт, мен дагы.
– Ким болгуң келет?
– Ата-энем “андай бол, мындай бол” деп кеңеш айтат, анан мен дагы түрдүү кесиптин башын ойлоном. Бирок бирөөнө да токтоло элекмин. Атам бир жолу “асем буюмдарынын дизайнери бол” деп калды. Мен ойлонуп жатам, эки-үч жылдын ичинде пландар дагы далай өзгөрсө керек.
– Саясат сени кызыктырабы?
– Ооба, саясатка кызыгам. Бирок кесибим бул тармакка тиешелүү болбойт го. Кайсы тармакты тандабайын, максатыма атамдын арты менен эмес, өзүмдүн аракетим менен жетсем дейм. Анткени атама катуу сөз тийгизгим келбейт. Ошентсе да бардык саясий жаңылыктардан артта эмесмин.
– Мисалы, соңку жаңы­лык­тар боюнча эмнеден кабарың бар?
– Атамдын шайлоого катышып калуу мүмкүндүгүн билем.

Эльвира Караева
koom@super.kg