“Мага жалган жалаа жабылып жатат. Куру ушактын курмандыгы болгум келбейт. Эл чындыкты билүүгө тийиш”,- дейт кеңсебизге баш баккан ырчы Клара Алибекова. Эмне тууралуу сөз болорун ырчынын өз оозунан уксак.

– Клара, кеңсебизге келип калып­тырсыз...
– Ооба, жакында эле кайсы бир гезитке “Клара ичкен кудугуна түкүргөнбү?” деген аталышта макала жарык көрүптүр. Гезитте “Айчүрөк айым балапан кезинен таптап, чоң сахнага алып чыкканын көпчүлүк билет. Тилекке каршы, шакирти эжекесинин эмгегин текке кетирип, алдыдагы бактысын аттап кеткен дешет...” деген сыяктуу көп сөздөр жазылган экен. Чынында, мени сахнага биринчи Айчүрөк эже алып чыккан эмес. Мен эжеге 8-классымда келгенмин. Сахнага болсо 5-классымдан тарта эле чыга баштагам. Ал кезде мен өтө жаш элем, Айчүрөк эженин сунушу менен анын тобунда иштеп калгам. Мен буга чейин устатым катары сыйлап келгем. Анан “бактысын аттап кетти” дегендери болмок беле?!
– “Кларанын Айчүрөк эженин өмүрлүк жолдошу Таалай менен байланышы бар экен” дешкенине кандай дейсиз?
– Окуп алып төбө чачым тик турду. Гезиттин жазганына караганда, Айчүрөк эженин өмүрлүк жолдошу менен мамилем болгон үчүн экөөбүздүн ортобузду кара мышык аралаган имиш. Мен эже менен бир жылдай гана иштешкем. Ал кезде секелек кыз болсом, кайдан жолдошу менен мамиле курмак элем? Окуган соң дароо “кандай далилге таянып жаздыңар?!” деп гезиттин редакциясына бардым. Эки күн өткөндөн кийин мага “ушундай кат келиптир” деп катты көргөзүштү.
Баса, гезит чыккандан кийин мага Айчүрөк эже чалыптыр, “Клара, биз жөнүндө маалымат кетип жатыптыр го” деп. “Ооба” деп гезиттин атын айтсам, “ушундай гезит бар бекен, укпаптырмын?” деди. Кийин гезитте иштегендерге “Айчүрөк эже силердин гезитти билбейм дебедиби?” десем, “билет эле” деп күлүштү.
Негизи, мен анча-мынча ушактарга маани бербейм. Бирок бул жолкусу жаныма батты. Көптөгөн ырчылар Айчүрөк эжеден “Клара сенден эмнеге кетти?” деп сурашса, “жолдошум менен мамиле түзүп алганы үчүн кетирдим” деп жооп берип жүргөнүн өз кулагым менен уккам. Өзү кетирмек тургай, кетип жатканымда “Клара, кетпей эле койчу...” деп ыйлаганы дале эсимде.
– Анда мындай ушактар кайдан чыгууда деп ойлойсуз?
– Чынын айтсам, кайдан, кимдин чыгарганын билбейм. Бирок мен мунун баарын Айчүрөк эжеден көрөм. “Менин колумдан тарбияланган кыз” деп сыймыктанып койгондун ордуна журтка жаман көрсөтүп жатканына таң калуудамын. Ушундан уламбы, учурда эже менен мамилем жок.

Айчүрөк эжекесине таарынган Клара бизге ушуларды айтып кетти. Окуучусунун таарынычын окуган устат буга эмне дээр экен? Анын да оюн угууга даярбыз.

Венера Кабакбек кызы
star@super.kg