Акыркы жарым жылдын ичинде Ош облусунда суицид (өзүн-өзү өлтүрүү) окуяларынын саны бир канча эсеге көбөйдү. Бул жөнүндө Ош шаарынын Ички иштер башкармалыгынын өкүлү Замирбек Сыдыков кабарлады. Анын айтымында, соңку 6 ай ичинде укук коргоочу органдар 57 суицид окуясын каттаган. Ал эми былтыркы жылдын ушул эле айларынын ичинде баары биригип 15 далил болуп өткөн. Өз жанын өзү кыйгандардын көпчүлүгү 16-35 жашка чейинки эркек кишилер болуп саналат. Мындан сырткары бул аралыкта 36 өзүн өлтүрүү аракети каттоого алынды. Анын ичиндеги 34 окуяда жаш кыздар бул дүйнө менен кош айтышууга белсенишкен. “Былтыр мындай көрүнүштөр эки эсе аз болчу”,- дейт З.Сыдыков.
Укук коргоо органынын кызматкери өзүн-өзү өлтүрүүнүн көбөйгөнүн Июнь окуясы менен байланыштырат. “Аны постконфликттик синдром деп коюшат”,- деп түшүндүрдү ал. Учурда коомчулуктун ичинде моралдык жана психологиялык жактан колдоочу иш-чараларды жүргүзүү боюнча уюштуруу иштери башталууда.