www.super.kg сайтынын Москвадагы активдүү колдонуучуларынын жолугушуусу жөнүндө буга чейин жазганбыз. Эми сайтыбыздын Австриядагы колдонуучулары жолугуп, чер жазышты. Алыста жүргөн мекендештерибиздин ынтымагына, алардын биригүүсү үчүн көпүрө болуп бергенибизге кубандык.

КЫРГЫЗЧА СҮЙЛӨБӨСӨҢ, АЙЫП ТӨЛӨ!
24-июлга Австриянын Линц шаарында белгиленген бул кеченин уюштуруучусу Супер-Форумда Aydashka деген ник менен катталган мекендешибиз болду. Бул суперстандыктардын Австриядагы алгачкы жолугушуусу болгондуктан, форумчулар толкундоосун жашырышкан жок. Атүгүл “биз толкунданып жатабыз, эми кандай жолугушуу болор экен?” деген сыяктуу билдирүүлөрдү күн мурун форумга биринен-бири өтүп калтырып жатышты. Ошентип, белгиленген күнү, белгиленген жайга суперстандын 11 тургуну келди.
Жолугушууда алар “жалаң гана кыргыз тилинде сүйлөшөбүз” деген талапты кабыргасынан коюшкандыктан, “оозунан башка тилде сөз чыккан адам 50 цент (22 сомдун тегереги) айып төлөйт” деп чечишкен эле. Муну менен мекендештерибиз бөтөн жерде өз эне тилинде чер жазыша сүйлөшүүнү максат кылышкан экен.

“ТИРҮҮ” БЫЙТЫКТАР ЖАНА ӨЗГӨЧӨ ТОРТ
Жолугушуунун оригиналдуулугу бул – атайын жасаткан быйтыктар (смайлик) болду көрүнөт. Алардын ар бири колдоруна форумдагы быйтыктарды кармап алып, ылайык келген жерден сөздөрүнө колдоно калып тамашалашканын баяндашты.
Ак дасторкондун көркү “Супер-Инфо” Австрияда” деген жазуусу бар ширин торт болгон экен. Кыргызча ырларга бийлеп, болушунча мекенге болгон сагынычты таркатып, өз ара достук мамилесин бекемдешкен алыстагы мекендештер кийинки жолугушуу да алыс эмесин айтып, таркап кетишти...

ЭМКИ КЕЗЕК БИШКЕКТЕ
Кыргызстандагы суперстандыктар да четте калган жок. Алар алдыдагы алтын күзгө укмуштуудай жолугушуу уюштурушууда. Учурда бул жолугушууга каттоо форумдун “Суперстан” бөлүмүндө жүрүп жатат. Андыктан бизге кошулгусу келген окурмандардын баарына эшик ачык экендигин айта кетели.

Мирана Мамырбаева
forum@super.kg