Аталышы – “Кусалык”
Башталышы – 20:05 (35 мүнөт кечигип башталды)
Билет баасы – 150-300 сом
Көрүүчүлөр – Спорт Ордосунун 70 пайызы
Алпаруучу – Турусбек Жумалиев
Катышуучулар – Санжар Бердибеков, Роза Шакирова, Мирлан Баеков, “Жоролор” тобу, Ынак Осмоналиев, “Кеңеш” тобу, Мая ж.б.

Ишемби, 3-сентябрь. Спорт Ордосунда “Кусалык” аттуу Айнура Салахидинованын концерти болуп өттү. Алгач Ордонун ичине кирбей туруп, сыртындагыны айтайын. Концерттин билеттери “распродажа” эле болду. 300 сомдук билетти 150 сомго сатышып, тутамдап билет көтөргөндөр эле көп. Ошентип, “мына арзан билет, менден алгыла” деген кыйкырыктар басаңдап калганда залга кирдик. Партердеги оюлуп-оюлуп калган байкуш отургучтардын оңдоло турган күнү бар белем, партердин эки капталы отургучсуз бош калыптыр.
Сахна суз жасалгаланыптыр, сары жалбырактар илинип, күздүн белгисин берейин деген ойдо болсо керек. Кыргыз көйнөкчөн көйкөлүп Айнура чыкты сахнага “меникиндей арман барбы?..” деп сыздап ырдап. Сахнанын оң капталына илинген экрандан клиби кошо кетип, эл Айнураны карабай эле башты оң жакка буруп, экранды тиктеп клип көрүштү. Толкунданган ырчы эл менен учурашып туруп, дагы эки ырын ырдады. Жай, армандуу сүйүү тууралуу ырлар көп аткарыла бергенге келгендер термелип ыр угуп отурушкан. Бул тынчтыкты “Жоролор” тобу бузду. Жаш куудулдардын элге жакын темадагы сатирасы боорду эзип, залдан каткырыктар чыга баштады. Мирлан Баеков визиттик карточкасы болгон “Кызыл өрүгүн” эмес, “Каниет” аттуу ырды аткарып, шатырата кол чабууларга арзыды.
Кайрадан сахнада Айнура. “Тар болуп дүйнөм, териме батпай баратам...” деп буулугуп ырдап жатат, угуп отуруп куш уйку салып кетипмин. Роза Шакирова чыга калып “аа-аай, жүрөгүм, ай, жүрөгүм, аа-ай” деп бакырып ырдап, көзүмдү фонардай ачып жиберди.
Ырчы достору тамашалап айткандай, “аппак кыз” атка конгон Айнуранын “карап тур, мен сени сүйдүрүп албасамбы” деген ыры бойдок жигиттерди “айт-уйт” деп кыйкырганга аргасыз кылса, апасына арнап чыгарган ыры залдагы аялзатынын жүзүнө кубаныч тартуулады. Көңүлүн кыя албай келгенби же көңүлүнө жакындын баарын чакырганбы, айтор, көп ырчы катышты. Улактай секирип бийлеген Нурлан чунак “Эркелетсемби” аттуу ырын ырдап жатса, экранда “Жоопсуз сүйүүсүнүн” клиби көрсөтүлгөнү калпыс болду.
Антракт узакка созулуп, “эу, башта, светти өчү-үр” деп амфитеатрда отургандар чыдабай кыйкырып баштаганда бийчилер чыкты. “Жаз”, “Тату” деген бий топторун билбейт экем, бирок такшалыш керек экен бий жактан ал кыздар. Болбосо, сөлөкөтүн көрсөткөнү бекер. Кыскасы, төрт көйнөк которуп, сегиз ыр ырдаган Айнуранын концерти башка ырчылардыкынан эч айырмаланбаган катардагы ашар концерттин бири болду.

Толик сынчы