Америкалык жигит соода түйүнүнөн жайкы бутка илип алмай (шлёпанцы) сатып алган. Этикеткасында чыгарылган өлкөсү катары Кытай көрсөтүлгөн. “Жайкы ысыкта бутум аба жутуп, эс алсын” деген жигит илип алмайды 2-3 ирет кийген соң эле бутунан кандайдыр бир оорутууну сезет. Бирок “жаңылыгын кылып жатат окшойт” деп алгач маани бербейт. Акырында дарыгерге кайрылууга аргасыз болот. Анткени бутунда кычышуу жана кызаруу жаралган. Дарыгер анын буту химиялык күйүккө чалдыкканын айтат. Көрсө, илип алмайдын үстүндөгү ичке тасмасы (ремешка) колдонууга жарабай турган материалдан жасалыптыр. Башкача айтканда, терини химиялык күйүккө дуушарлантуучу материалдан жасалган экен!
Учурда дүйнөлүк рыноктогу бут кийимдердин 60 пайызга жакыны Кытайдан чыгарылат. Демек, бул бут кийимдер дүйнөнүн ар бурчунда сатылат. Анын ичинде Кыргызстанда да. “Арзандын тузу татыбайт” демекчи, канчалык арзан болсо, ошончолук сапаты төмөн. Андыктан арзанына качырып сапатсыз бут кийим алып, ден соолугуңузга зыян келтирип албаңыз.