Көрүүчүлөрдүн суктанган көздөрү, кол чабуулар, гүлдестелер... Ырчылар, дегеле шоу дүйнөнүн өкүлдөрүнүн турмушу карапайым калкка абдан кызыктуу, мазмундуу туюлат. Чынында эле кызыктуу. Бирок ошол эле маалда сахна артында карапайым калктын ою-түшүнө кирбеген жаңжалдар, териштирүүлөр, далыдан бычак саюулар болот. «Булардын баарын эмнеге термелеп жазып калышты?» деген ой жаралган чыгар.
Бир окуя, продюсер Динара Эсенгулова менен Айдин Шердин ортосундагы уруш-талаш бизди ошондой ойлорго түртүп турган чагы. Экөөнүн соттошуп жатканынан кабарыңыз бар да. Бири жаштык курчтугуна салып “соттон уттум” деп, алдыда дагы канча инстанция турганын этибар албай жатса, экинчисинин маанайы бузулуп турганбы, айтор, “шоу-бизнестин ашмалтайын чыгарып жатасыңар” кыязында бизге мурду менен бир тийди. Таң калдык. Бизби же аларбы, сахна дүйнөсүн астын-үстүн кылып жаткандар?