ТАТА УЛАН АМАН-ЭСЕН
Интернеттеги сайттардын биринен “Атактуу ырчы Тата Улан каза тапты” деген теманын алдындагы “Тата Уланды Жумушчулар шаарчасы тараптан түндө кичиавтобус коюп кетиптир. Ооруканага жеткирилгенче каза болуп калыптыр. Бир канча жери сынып, көп кан жоготуптур. Кичиавтобустун шоопуру мас абалында болчу. Бул окуяны милиция кызматкерлери изилдеп жатышат. Таланттуу адамдардын эрте дүйнө салышы өкүнүчтүү” деген маалыматты окуп алып чочуп кеттик. Маалыматты тактоо үчүн өзүнө телефон чалганыбызда:

– Мен андай ушакты уга элекмин, Кудай сактасын. Кудайга шүгүр, жакшы элемин. Кудайдан коркпогон кайсы келесоо мындай жаман кабарды таратты болду экен?! Эми бул дүйнөдө болот экен да. Көрө албагандар көп экен. Анын ким экенин бир Кудай билет. Мага чын жүрөктөн баары бир!- деп жооп берди.

КУМАР АСАНОВ ГЕЙБИ?
“Ысымын өзгөрткөн атактуулар” деген макала жарык көрдү эле, бир жолу. Ошол макала сайтыбызга жүктөлгөндө бир форумчудан мындай кат келиптир:

kuba_kg, 05.10.2011. Кумар – гей. Менин досум менен болгон. Моюнуна коюп берем. Бул менин номерим – 892460619ХХ. Чалгыла, ишенбесеңер.

Ислам Сатаров, Кумардын продюсери:
– Чыгармачыл адамдар мындай ушактардан качып кутулбайт экен да. Чындыгында, андай эмес. Кумардын Орусияда жашаган орус улутундагы сүйлөшкөн кызы бар. 1-2 жылда үйлөнөт. Шоу дүйнөсүндө ушактар көп айтылат. Бул эми мыйзам ченемдүү эле көрүнүш го дейм. Көрө албагандар көп да.

АЙДИН ШЕР СҮЙЛӨШКӨН КЫЗЫНА ТЫЮУ САЛАБЫ?
– Саламатсыңарбы, “Супер-Инфо”? Айдин Шер Замира Молдошеванын салонунда иштеген бир визажист кыз менен сүйлөшөт. Ал кыз бир сынакка катышайын десе, “бир үйдөн бир эле ырчы чыгышы керек” деп болбой коюптур. “Айдин Шер кызды ала албай жатып башкарып алган экен” деп салонго барган досум айтып келди. Айдинден жооп алып бересиздерби?

Айдин Шер:
– Ооба, визажист кыз менен сүйлөшкөнүм чын. Катта айтылгандай, сынакка эмес, телеберүүгө катышууну суранган. Мен, чындыгында, каршы болгом. Бирок ал катышууну аябай каалагандыктан, акыры макул болдум. Бирок муну тыюу салуу деп эсептегенге болбойт. Жөн гана анын эл алдына чыгышын каалаган эмесмин. Бирок, тилекке каршы, азыр аны менен сүйлөшпөй калдым.

Перизат Музуратбекова
star@super.kg