Шайырбек Араповду же “Браводон”, же “Балдардын сынагынан сынбайсыңбы?” көрсөтүүлөрүнөн алпаруучу катары көрбөй калганбыз. Кесиби юрист эле, ошол жакка ооп кеткенби деп сурасак, жок, телеканалда эле иштеп жүргөнүн айтты. Эми “Балдардын сынагынан сынбайсыңбы?” долбоорунун алпаруучусу эмес, жетекчиси болот экен. “Аталган берүүнүн форматын өзгөртүп, башка өңүттө алып чыгабыз” деп жүгүрүп чарчап, шайы кетип турган чагы Шайырбектин.
Ал эми Максат Доврановду 60 мүнөт бою ЭлТРден көргөндөр азыр “Кутман таңда” жана “Чак түштө” гана көрүп калышкан. Мунун себеби Максаттын берүүсү жабылып калганына байланыштуу. “Мурдагы берүүм эфирге кайра чыкса болот эле” деп муңканган Максат мурдуна операция жасатып, ооруканадан чыкканына аз эле күн болду. Мурдун чоңойтуп же кичирейтип пластикалык операция жасатыптыр деп ойлоп калбагыла. Анткени Максат: “Мурунум сынган эле, эт өсүп кетиптир. Эки жолу операция жасаттым, азыр жакшымын”,- дейт.