Алгач сахнага ырчы катары чыгып, анан кино тармагында багы ачылган Алиман аттуу актриса маек төрүбүздө. Бул кыздын ырчылык таланты канчалык деңгээлде экенин “Импульс” тобунда ырдап жүргөндө, ал эми актрисалык шыгын “Гаишниктер”, “Кызыл көйнөкчөн-2” жана казак­тардын “Жаным” сериалынан байкасаңыз керек.

– Алиман, айтылган сааттан кечикпей келдиң, кечигүү деген “оорудан” алыс окшойсуң...
– Бардык учурда таптак жүрөм деп айта албайм. “Супер-Инфо” дегенден кийин аябай даярданып, кечикпөөгө аракет кылдым.
– “Импульс” тобунан кеткенден кийин эле сахнадан көрүнбөй кеттиң. Ырчылыкты жыйыштырдыңбы?
– Чынында, ырчылыкка караганда актрисалыкка баш-отум менен өтсөмбү деп жатам. Ырчылыкка аябай кол түрүп иштебей калганыма келечекте өзүмдү мега популярдуу ырчы катары элестете албаганым да себеп болду. Ал эми “Импульс” менен болгон келишимди узартса деле болот, бирок ал жерде “күйөөгө тийүүгө болбойт” деген пункттар бар. Мен 21ге чыгып калдым. Балким, күйөөгө чыккым келсе, келишимге байланып калышым мүмкүн.
– Анда кел, сенин ырчылык эмес, актрисалык чыйыр жолуң тууралуу сүйлөшөлү. Эсиңде барбы алгачкы жолу киного тартылганың?
– Алгачкы жолу кино ааламынын босогосун 15 жашымда “Теңири” деген тасмага тартылуу менен аттагам. Ал тасмада кыргыздын жаш келининин эпизоддук ролун жараттым. Режиссёру Мария аттуу француз айым болчу. Чынын айтсам, фамилиясы эсимде жок. Кыргызстан башка мамлекеттер менен биргелешип тарткан тасма эле. Ошол тасмага тартылуу маалында Эрнест Абдыжапаров агай менен таанышып калдым. Ошондо Эрнест агайдын “сен мыкты актриса боло турган кыз экенсиң” деген сөзүнөн кийин “мен актриса боло алат экенмин” деген ишеним пайда болду. Биринчи жолу башкы ролум казактар тарабынан тартылган “Жаным” аттуу сериалда Мика деген олигархтын кызынын ролу болду.
– Байкашымча, “стервалардын” ролун мыкты жаратасың. Жашоодо да ошондойсуңбу?
– Мени сыртымдан тааныгандын баары “стерва” дешсе керек. Сыртымдан ошондой көрүнгөнүм менен, сүйлөшө келгенде андай деле эмесмин. Сен айткандай, тартылган тасмалардын көбүндө “стерванын” ролу туш келип калат. Анан тебишип-мушташып эле жүрөм го тасмалардан, ошондон улам да мени көп балдар “стервалардын стервасы” деп ойлошот экен.
– Тасмаларда тегеренип тепкениңе караганда спорт менен машыгат окшойсуң. Анча-мынча тийишкен балдардын жазасын берип койсоң керек...
– Айкидо менен бир аз машыккам. Негизи, спорт менен машыгууну жактырам. Бирок убакыт өтө тар. Ал эми жанагы балдар боюнча, убагында болгон, анча-мынча балдардын жазасын берип койгон учурларым.
– Буга чейинки тартылган тасмаларыңдын ичинен сага эң оор түшкөн ролдоруң болду беле?
– “Кызыл көйнөкчөн-2де” аткарып жатканда өзүм роль жаратып жатканымды туюп турсам да, артымда арбак карап тургандай сезилип, коркуп, жаман болдум. Ошол эле тасмада машинанын артынан чуркаган жерим бар. Жол аябай таштак экен. Жылаңаяк чуркай албай кыйналгам.
– Жаштайыңдан эле чыгармачылыкка аралашып калыптырсың. Кесип тандоого келгенде Улуттук университеттин эл аралык мамилелер факультетин кандайча тандап калдың?
– Жашоо адамды миң өзгөртөт да. Балким, дипломдогу алган кесибимди аркалап да калышым мүмкүн. Бирок азыр актрисалык кесип мен үчүн биринчи орунда.
– Ата-энең, бир туугандарың туурасында айта кетсең?
– Атам да, апам да Чүйдөн. Бирок мен Каракол шаарында төрөлүп, 3 жашка чыкканча ошол жакта жашап, анан кайра шаарга көчүп келгенбиз. Атам Каныбек кесиби боюнча – режиссёр, апам Токтокан – актриса, анан Искендер деген менден 7 жаш улуу байкем бар. Атам менен апам Москвадагы
ГИТИСте окуп жүрүшкөндө таанышып, үйлөнүшкөн экен. Кыязы, актрисалык талантым экөөнөн тең берилсе керек. Учурда менин жакындарымдын баары Москвада. Атам “Мосфильмдин” бир долбоорунда жүрөт. Апам өзүнүн кичине бизнеси менен алек. Байкем болсо Орусиянын жараны. 13 жылдан бери ошол жакта ишкердүүлүк менен алектенет. Алар менен күн сайын интернет аркылуу байланышып турам.
– Байкең үй-бүлөлүү да?
– Жок. Азыр “активно” кыз издөөдө. Жакшы кыздар болсо айтып койчу, байкеме жардам берип, эртерээк жеңелүү болоюн, тамаша.
– Бир үйдүн эрке кызы болуп чоңойгон турбайсыңбы...
– Мектепке киргенче аябай эле тентек, эрке болуптурмун. Эркек балдардан беш бетер чогуу ойногон балдарды сабай берчү экенмин. “Арызданып келген ата-энелерден бир күн куру өтчү эмес” деп апам айтып калат. Ошондон уламбы, ата-энем “кыздай болуп назик тарбиялансын” деп балет мектебине киргизишкен. Балет мектебинде бийлегенден баскан-турганыңа чейин катуу көзөмөлгө алынат да. Анан ал мектеп мени өзгөртүп, созолонгон кыз болуп эле чыга келдим. Балетте 8-класска чейин окудум. Андан кийин Бишкектеги №65-мектепке которулганда чыныгы жашоо эмне экенин билдим да, кайра эркиндикке чыктым. Балдар менен кырылышып, анча-мынча сөгүнгөндү үйрөндүм. Сабактарды калтырып, начар окуй баштадым. Ошентип, кайрадан бузулуп кеттим. Анан Ишеналы Арабаев атындагы университеттин алдындагы лицейге тапшырып, чоңоё түштүм окшойт, ал жактан окууга көңүл буруп, ийгиликтүү аяктадым.
– 21ге чыкканыңды айтып, үй-бүлө куруу тууралуу кептин учугун чубай кеттиң. Апаң сеп даярдап жаткан го?
– Жашырбайм, менин аябай сүйгөн жигитим бар, аты Бакыт. Аны “Босс” деп эркелетип коём, томпошка бала да. Өзү Таластан. Ишкердүүлүк менен алектенип жүрөт.
– Ата-энең менен тааныштырдыңбы?
– Ооба, атам да, апам да болочок күйөө баласын жакшы көрүшөт. Апам мага телефон чалган сайын “кандай жүрөсүңөр, урушпай элесиңерби?” деп сурап турат.
– Качан анан той?
– Ойлонуп жатам. Кыз-жигит болуп жүргөнүбүзгө эки жылдын тегереги болду. Алдын ала айтпай коё турайын, ким билет, эртең эмне болуп кетерибизди.
– Бактылуу бол! Сага ийгилик каалайбыз.

• Алиман Дүйшеналиева 1990-жылы 20-майда жарык дүйнөгө келген.
• “Кыздуу болсоң, атын Алиман кой” деп атасына Чыңгыз Айтматов айткан экен.
• Досторунун көбү Алиша деп чакырышат.
• Орус тилинде катыра сүйлөп, кыргыз тилинен кичине кыйналат, англис тилинде эркин сүйлөп, француз тилин үйрөнүүдө.
• Жөргөмүштү көргөндө дене бою калтырап кетет, ал эми караңгы жерлерден өтүп баратканда жүрөгү кабынан чыгып кетчүдөй согуп калат.
• Учурда Кыргыз мамлекеттик университетинин 4-курсунун студенти.
• “Теңири”, “Жаным”, “Уурунун махабаты”, “Гаишниктер”, “Кызыл көйнөкчөн-2”, “Сүйө бил” (“Умей любить”) деген тасмаларга тартылган.

Бахияна Сатылганова
Алимандын өздүк архивинен
star@super.kg