Алмазбек Атамбаев кыштын биринчи күнүндө президенттик кызматка киришти. Кыш деген эле аты болбосо, Бишкек шаары жаздын күнүндөй жылуулукка бөлөнүп, күн чайыттай ачылып турду.

01.12.2011.
Бул дата өлкөнүн тарыхында дагы бир маанилүү күн катары эсте калат. 0, 1, 2 сандарынан турган жогорудагы датаны нумерологдор «жаңы жышаандын белгиси» деп чыгышты. Анткени булар сандардын сап башында турат. Эгерде бул датадагы сандарды кошсок, жыйынтыгы 8 болот. Нумерологияда 8 – чексиздиктин белгиси.
Бул күнү кар жаабай, шамал болбой, күндүн чайыттай ачылышын табигый кубулуштарга ишенген адамдар жакшылыктын жышааны катары жылуу кабыл алышты.

БОЛОТ ЭКЕН ГО...
Бир президент экинчиси менен ээрчише чыгып, жеңиши менен куттуктап, өз колу менен бийликти өткөрүп, анан сахнадан чогуу түшкөндөрүн көрүп отуруп, “ушинтсе болот экен го...” деген ой кылт этти. 20 жылдан бери мындайды көрбөгөн жаныбызга бул салтанат чоочундай сезилди. Борбор Азиядагы мамлекеттердин ичинен биринчи болуп ишке ашырганыбыз бизге сыймыктануу жаратты. Антпесе, коңшу лидерлердин дале тагын бекем кармап отурушканына күбөбүз.

“КЫРГЫЗ ТИЛИ БАЛА БАКЧАДА...”
Алмазбек Атамбаевдин президент катары элине болгон биринчи сөзү көпкө созулбады. Баш-аягы 10 мүнөттүк кайрылуусунда ток этер учурларга токтолуп, анда «ар бир жаран өз өлкөсүндө жумуш менен камсыз болушу керек», «кыргыз тилди бала бакчадан, башталгыч класстардан тарта үйрөтө баштайбыз», «паспортко «улуту» дегендин ордуна «кыргызстандык» деп жазуу зарыл» деп белгиледи.
Президенттин “биз эч качан кул болбойбуз!” деп кайра-кайра басым менен айтканы алкыштар менен кабыл алынганын эң бир урунттуу учур катары белгилөөгө болот.

ОТУНБАЕВА КЕЧИРИМ СУРАДЫ
Роза Отунбаева өлкө башчылык кызматынан кетерде Жогорку Кеңеште депутаттардын алдында өзүнүн акыркы сөзү менен кайрылды. Мында белгилөөчү жагдай – экс-президенттин кан төгүүлөр үчүн кечирим сурагандыгы.
Роза айымдын бийлигинин оң-терс жактарын тарых өзү да тастыктайт. Азырынча ТИМдин дипломатиялык академиясы Отунбаеваны Нобелдин Тынчтык сыйлыгына көрсөтүү демилгесин көтөрүп чыкты.