Бишкек шаарынын мэри Иса Өмүркуловдун уулу Азамат Исаев катышкан жол кырсыгында үч адам каза тапканын, анын бири кыз экенин жазган элек. Мына эми ошол маркум кыздын атасы Мырзабек Исмаилов ИИМдин Баңгизатты мыйзамсыз жүгүртүү менен күрөшүү боюнча башкы башкармалыктын башчысынын орун басары болуп дайындалды. Эскертүүчү жагдай, дал ушул киши башка жабыркоочулардан айырмаланып, соттук ишке чейин доо арызын албай койгон.
Исмаилов 2006-жылы Баңгизатты мыйзамсыз жүгүртүү менен күрөшүү боюнча башкы башкармалыкты жетектеп турган. 2010-жылы ИИМдин Кылмыш иликтөө башкы башкармалыгынын башчысынын орун басары болчу. Бирок ал Июнь окуясынан кийин кызматынан бошотулуп, Өзгөн райондук ИИБинин башчысы болуп дайындалган. Кадыресе жумуштан көтөрүлүүбү же Өмүркуловдор менен сүйлөшүүдөн улам чоң кызматка келдиби, кыскасы, ойлонтпой койбойт.