Өткөн аптадагы футболдук уик-энддин башкы жаңылыгы футбол ышкыбоздору чыдамсыздык менен күткөн эль-классико аталган “Реал”-“Барселона” беттеши болду окшойт. Оюн бир түндүк уйкудан калгандарды өкүндүргөн жок. Үй ээлери – мадриддиктер эсепти 22-секундда ачканына карабастан, каталондуктар 3:1 эсебинде ишенимдүү жеңишке жетишти. Карим Бенземанын голуна “Барса” Алексис Санчес, Хави жана Сеск Фабрегастын голдору менен жооп берди.
Ал эми Тумандуу Альбиондо да күйөр­мандарды кайдигер калтырбаган беттеш болуп өттү. Абрамовичтин “Челсиси” арабиялык шейхтер каржылаган “Манчестер Ситини” кабыл алды. “Сити” буга чейин 14 оюнда жеңилбей, сенсация жаратып келаткан. Бирок алардын мындай сериясы Лондондо үзүлдү. 2:1 эсебинде аяктаган беттеште голдорду “Ситиден” Марио Балотелли киргизсе, “Челсинин” курамында Рауль Мейрелеш менен Фрэнк Лэмпард (пенальтиден) айырмаланышты.