Рыспай Төлөгөнов (солдо) казактардын мушкерин жер каратып,
алардын түшүнө киргидей эле беттеш тартуулады.

16-17-декабрда баш калаабыздагы “Стронг” фитнес жана бокс борборунда эрежесиз эр уруштун вале-тудо версиясы боюнча Азиянын кубогу өттү. Мелдеште Өзбекстан, Казакстан жана Кыргызстандан чогулган 40тан ашуун мушкерлер 5 салмак категориясында айыгышкан таймаш өткөрсө, белгилүү себептер менен тажикстандыктар андан куру калышты. Чынында, бул күндөр спорт сүйүүчүлөрүнө майрам эле болду. Беттештер жогорку деңгээлде өттү. Андан тышкары бул күн көп сандаган мушкерлердин баш тартуулары жана жыйынтыкка нааразы болуп, рингден кетпей кошумча раунд талап кылгандары менен эсте калды. Кече ошондой эле тай бокс, профессионалдык бокс боюнча рейтингдик беттештер менен жана айымдар арасындагы эрежесиз эр уруш менен коштолду. Жыйынтыкка келсек, ата мекендик спортчуларыбыз триумф жаратып, беш салмактын төртөөсүндө чемпион болушту. Абсолюттук салмакта мушкерлерибиздин канчалык жан үрөгөнүнө карабай устукандын чоңун казактар канжыгасына байлап кетишти.

Чемпиондордун тизмеси
Рыспай Төлөгөнов (60 килограмм, “Спарта” клубу)
Бектемир Абдразаков (65, ИИМ академиясы)
Жумабек уулу Актилек (70, Улуттук курама команданын өкүлү)
Бакыт Бекбоев (80, Улуттук курама команданын өкүлү)
Николай Кучин (+80, Казакстан)

Кыздар арасында
Гүлжаз Сакимова (65, "Сторнг")
Галилея Кудайбергенова (75, "Стронг")