Мындан 2 жыл мурун Мехиконун барларынын биринде башына ок тийип, өлүм төшөгүндө жатып калган Сальвадор Кабаньяс чоң спортко кайтып келди. Андагы абалын көргөндөр спортту кой, анын бутка турарына ишенбеген. Чоң спортто чанда гана кезиккен бул көрүнүштү кеп кылбай өтө албадык.

МУНДИАЛГА КАМЫНТПАЙ АТЫЛГАН ОК

Сальвадор Кабаньяс Парагвайдын улуттук курама командасынын жана Мексиканын “Америка” футболдук клубунун экс-голеадору (футболдогу мыкты чабуулчу жана бомбардир). 28 жаштагы спортчу футболчулук чыйыр жолун 1998-жылы парагвайлык “12-октябрь” клубунда баштаган. Бир канча мелдеште башкы бомбардир аталган Сальвадорго толук бакыт үчүн Дүйнө чемпиондугуна катышып, аны утуу гана калган. Бирок "ЮАР-2010го" аз убакыт калганда миллиондогон парагвайлыктардын шору катып, футболчу башка ок жеп комага түшөт. Окуя болгон жерден куйрук түйүп из сууткан кылмышкерлер 5 айдан соң табылган. Алар мексикалык “чёрныйлар” Хосе Франсиско Баррето жана Бальдерас Эдгар Вильярреал болуп чыккан.

ЖАШОО ҮЧҮН КҮРӨШТҮН СИМВОЛУ

Башына ок тийген футболчу ооруканага жеткирилип, операция жасалат. Кызыгы, дарыгерлер анын башынын арткы бөлүгүндө туруп калган окту чыгара алышкан эмес (ок азыр да башында). Бирок өлөт-өлөт деп комада жаткан футболчу футбол сүйүүчүлөрүнүн кубанычына 5 айдан соң ооруканадан чыгарылып, майданга 2011-жылы экс-клубу "Америка" менен Парагвайдын жолдоштук оюнунда келди. Оюн футболчунун көңүлүн көтөрүп, дем берүү үчүн уюшулган. Ал мындай бактылуу мүнөттөрдү дагы көп көрүү үчүн быйыл январда спортко кайтып келди. Спортчу өзүнүн алгачкы профессионалдык клубу “12-октябрь” менен келишим түзүп, машыга баштады. Муну менен ал сүйгөн иштен өлүм гана ажырата аларын далилдеп, кайтып келүүнүн, жашоо үчүн күрөштүн өчпөс символу болуп калды.
Азамат, Кабаньяс! Эми Дүйнө чемпиондугуна катышууну 2 жыл күтсөң да, гол киргизип кубантчу күн алыс эместир...

Максат Кудайбердиев
sport@super.kg