БАШ СӨЗ ОРДУНА
"Ошол да тоолук кыргызбы?", "Таппай жүрөм" деген ырлардын автору, маркум акын Өмүркул Кулумбаевдин кызы Гүлмира Кулумбаева атасы тууралуу мындайча эскергени бар:
"Жашынан жайрап, муң тарткан,
Жан дүйнөсүн кайгы сыздаткан.
Энеси буга сүт эмес,
Эмчектен шорду ууртаткан.
Кейибей жүрүп өтөм деп,
Каткырып түшкөн курсактан... Ыр саптарында көрүнүп тургандай, атамдын балалыгы да атына жараша өмүрүнө кул болуу менен башталган. 27 жашында автокырсыктан улам анын буту баспай калып өмүрү менен көп күрөшкөн. Өзү бул тууралуу: "Атам Кулумбай өкмөттүк кызматта иштеп, 1931-жылы контрреволюциянын курмандыгы болот. Анын кыркы өткөндө мен төрөлүпмүн. Кан жутуп отурган энемдин карасын алып, сүйүнчү айтып атымды Өмүркул коюшат. Ысымга жараша тагдырым аныкталдыбы, айтор, билбейм, жаралгандан өмүрүмө кул, жашоомо бий болуп келатам",- деп айтчу".
Ушундай мисалдардан улам "Ысымдын тагдырга таасири барбы?" деген суроого жоопту ар кайсы тармактын адистеринен издеп көрдүк. Ысым кандайча адамдын тагдырына таасир берет? Ысым сизди башка адамдардан айырмалоо үчүн гана берилип калдыбы же анын көтөрүп жүрүүчү оор жүгү барбы? Айтор, жооп издеп көрөбүз...

Светлана Погодина, астролог: “ЫСЫМ ПАСПОРТ СЫЯКТУУ”
– Адамдын атындагы тамгалардын ар бирине тиешелүү саны бар. Аттагы тамгалардын сандарын кошуп, чыккан суммасынан Пифагордун нумерологиясына жараша ошол инсандын мүнөзүн, тагдырын билсе болот. Бул ысымдын тагдырга таасири чоң дегендик. Астрологияда ысымдардын таасири тамгалардын жылдыз белгилер менен байланышы боюнча да аныкталат.
Жылдыз төлгөсүнүн картасында чекиттер белгиленген. Ал чекиттерде мүнөздөр катылган. Кээ бир тамгалар ал адамдын жылдыз белгиси үчүн оор болушу мүмкүн. Ал күчтүү тамга жылдыз белгидеги чекит менен дал келип калса, анда анын таасири дагы да күчтөнөт. Тескерисинче, кээ бир тамгалар ал чекитке такыр тийбейт. Анда ал ат адамга бөлөк туюлуп, такыр таасирин тийгизбеши мүмкүн. Демек, жылдыз белги менен ат бири-бирине шайкеш келбесе, анын таасири аз же жок. Адам табиятынан күчтүү жаралса, анда аттын пайдасы да, зыяны да сезилбейт. Балага ат койгондо анын алсыз чекиттерин таап, баланын атына ал чекитти күчтөндүрүүчү тамга кошуп койсо болот. Кээ бир тамгалар күч, ишеним берсе, кээ бирлери жумшактыкты тартуулайт. Ушул себептүү адамдын мүнөзү аттагы тамгаларга жараша калыптанат. Ошондуктан ысым паспорт сыяктуу.

Лариса Асанбекова, эниоинженер, парапсихолог: “ЛАРИСАЛАРДЫН ТАГДЫРЫ ООР”
– Ысымдын адамдын тагдырына чоң таасири бар. Адамга жөн эле ат койбойт да. Атына жараша заты деп да бекер айтылбайт. Муну мындай түшүндүрөлү. Ар бир тамганын өзүнүн вибрациясы болот. Ошол вибрацияга жараша энергиясы бар. Дал ошол энергия баланын тагдырына таасир берет. Тамгадагы энергияларды санга айландырып туруп эсептеп чыгып, адамдын мүнөзүн билип койсо болот. Бирок тагдыр атка гана байланбайт. Адамдын жашоосуна таасир этүүчү башка факторлор да бар.
Ички энергия, жашоо образ да тагдырга таасир этет. Адам жаман ойлорду көп ойлосо, албетте, ал терс энергияны таратат. Адамга жаман программаны киргизип койсо, ал сөзсүз түрдө мүнөздү өзгөртөт. Менин атымдын энергияларын эсептегенде 8 деген сан чыгат. 8 санындагы адамдардын мүнөзү токтоо, кең пейил. Көбүнчө Ларисалар кооздукту, сулуулукту жакшы көрүшөт. Бирок тагдырлары оор. Көп учурда таланттуу, тамакты жакшы жасаган адамдар. Мисалы, мен тамакты жакшы жасайм деп мактана алам.
"Лариса" деген сөздү грек тилинен которгондо "назиктик", "ак чардак" дегенди билдирип, дене түзүлүштөрү жакшы болуп, элди өзүнө тартып турат. Ар бир инсандын тагдыры жеке атка эле эмес, анын кайсы мезгилде, кайсы жылы, кандай жылдыздын коштоосунда, күндүз же түндө туулгандыгы сыяктуу көп факторлорго байланыштуу.

Максат ажы Мамбеталиев, Кыргызстан мусулмандарынын Дин башкармалыгынын басма сөз катчысы: “ТУУРА ЭМЕС КОЮЛГАН АТ ЖАМАН ЖОЛГО ЖЕТЕЛЕЙТ”
– Мухаммед пайгамбар (С.А.В.) жакшы ат болсо калтырып, жаман атты жакшы атка өзгөртүүнү буюрган. Жаман аттарга Күндүн кулу, Жарганаттын баласы, Итбай, Чотбай дегендер кирет. Адам психологиялык жактан өз атына жарашканга аракет кылып, өзү сезбесе да, аты затына бара-бара жарашып калат экен. Эгер Күндүн кулу же кайсы бир адамдын кулу деп атаса, бара-бара ошондой болууга да аракет кыла баштайт. Дегеним, Кудайдын кулу болбой калганга да ниети чыгып кетет. Ошого ынанып туура эмес жакка бурулуп кетиши мүмкүн. Андыктан Мухаммед пайгамбар (С.А.В.) "бизге эң жакшы аттар бул – Алланын, Рахмандын кулу (Абдуллах же Абдурахман) деген жана Мухаммед, Иса, Муса, Жусуп, Жунус пайгамбарлардын аттары" деп үйрөткөн экен.
Исламдын тарыхында улук такыба аялдар өткөн. Кыздарга ошолордун ысымдарын ыйгаруу жакшы. Мисалы, Хадича (Калыйча), Фатима (Батма), Зейнеп. Адамдын аты ушул ыйык адамдардын атынан коюлса, ошол кишини изилдеп, ага окшошкусу келет. Азыр футболчу, шоумендердин атынан коюлуп жаткан ысымдарга ислам каршы. Алар адеп-ахлак тарабынан да мисал болуп бере албаган адамдар. Аларга окшошуунун кажети жок.

Перизат Музуратбекова
koom@super.kg