Бүгүнкү күндө кыргыз киносу кадыресе жанданып, элдин агымы кинотеатрды көздөй агылып калды. Бул мезгилден пайдаланып калууну каалаган режиссёрлор четтен чыгат. Ким билет, катар-катар тартылып жаткан кыргыз кинолорунун сапаты жакшырып, балким, өткөн кылымдын 80-жылдарындагы кыргыз кереметтериндей дүйнөлүк кинематографиядан өз ордун табар.
Учурда жаш режиссёрлордун эмгегинен жаралган тасмалар биринен сала экинчиси кинотеатрларда үзгүлтүксүз коюлууда. Мына ушундай фильмдердин катарында жакында эле Сүйүү күнүнө карата бет ачары болгон жаш режиссёр Адилет Акматовдун “Сүйө бил”, Сүйүн Откеевдин “Сокур кемпир” аттуу кыска метраждуу фильмдери бар. Мындан тышкары 8-Март – Айымдардын майрамына карата Руслан Машрапов кара далы кыздын тагдырын баяндаган “Асел” аттуу фильмди даярдап жаткан учуру.