Депутат Ирина Карамушкинанын айдоочусу эки адамды сүзүп кетип, анын бири каза тапты. Окуя 26-февралда саат 19:30 чамасында Бишкек-Торугарт жолунун 67-чакырымында болгон. Анда Карамушкинанын 28 жаштагы шофёру Алексей Хурасев 0039 KG номерлүү Тойота Камри үлгүсүндөгү автоунаасы менен жолдун четинде турган Кочкор районунун 70 жаштагы тургуну Асангазы Кутманалиев жана Сокулуктун 38 жаштагы тургуну Алмаз Матиевди сүзүп кеткен. Натыйжада, аксакал каза таап, Матиев оор жаракат алган. Ал эми сүзүп алган Лебединовка айылынын тургуну Хурасев кырсык болгон жерден качып кетип, бир канча убакыттан кийин кармалган. Кырсык болгон учурда депутат Ирина Карамушкина автоунаанын ичинде болбогонун айтат. Мыйзамга ылайык, депутаттардын кызматтык унаасы депутат пайдаланбаган маалда ЖКнын гаражында турушу керек. Карамушкинанын кызматтык автоунаасы бир жылдан бери гаражга да кирбептир. “Айдоочу мас абалда айдаганы үчүн өз жазасын алат”,- дейт депутат.