Алгач эле маектешимдин колунда бейкапар уктап жаткан наристеге көзүм түштү. Мемиреп тынч уйкуда... Атасынын таштап кеткенинен, апасынын кайгысынан кабары жок. Биз анын апасын редакцияга кайсы көйгөй алып келгенинен кеп баштасак.

ҮЙ-БҮЛӨНҮ АЖЫРАТКАН АЛЫСТЫК
– Алишер менен бир короодо ойноп, мектепти аяктагыча ээрчишип жүрүп чоңойдук. Мектепти бүтөрүм менен башка жигит мени коңшу айылга ала качып кетти. Барган күндөн баштап эле күйөөмдүн арак ичкени, ур-токмокко алганы жанга батты. Ажырашууга туура келди. Өз арабамды кылдыратайын деп Орусияга сапар алдым.
Күндөрдүн биринде Алишер менен кездешип калдым. Экөөбүз бала кездеги достордой эле сүйлөшө баштадык. Кийин мени сүйөрүн айтып, жанымды койбой артымдан сая түшүп алды.
Алишердин ата-энеси кичине кезинде эле каза болуп калышып, аны улуу эжеси чоңойткон. Бирок башка туугандары бар экенин билчүмүн. Такыр эле болбой, “үйлөнөм” деп апама телефон чалып, өз ниетин айтты. Алишер “мен өзүмдүн тагдырымды өзүм билем, сени да, эжемди да бага алам” деди. Экөөбүздүн никебиз кыйылып, бирге жашай баштадык. Боюма бүттү, бактылуу болуп жүрдүм.
Алишер ортодо бир алдамчынын кылтагына илинип, 40 миң рубль акчаны жедирип ийди. Акчанын тартыштыгынан казан-аяк кагышып, кыйнала баштадык. Мага Алишердин эжесиникине, Ошко кетүүгө туура келди. Ошко келгенимде жеңемди ээрчитип алып кайнежемдикине бардык. Башыма ак жоолугун салып, жакшы кабыл алды. Сөз арасында “башыңдан турмуш өтүп калган экен, акелери нааразы болушууда” деп калды.
Ай-күнүм жетип, Мираида аттуу кыздуу болдук. Кайнежем чакан бешик той өткөрүп, элден бата алып берди. Апам да “күйөөсү кай жакта болсо, аялы жанында жүрүшү керек, алыстап кетесиңер” деп көп айтты. Мага деле жеңил болгон жок, кантип эле күйөөмдөн кол үзгүм келсин?! Бирок күйөөмө кошумча түйшүк болбоюн деп, ага аяр мамиле жасадым.
Ортодо кайнежем менен да түшүнбөстүктөр чыга баштады. Мен базардан контейнер алып, колума кызымды көтөрүп, иштей баштадым. Ошол учурда базардан бир аялды жолуктуруп, ага кайгымды айтсам, Алишерге арнап тумар чийип берген. Көп өтпөй Орусияга жол тарттым. Мурункудай жакшынакай жашап калдык.

«БООР ООРУСАМ, БООРГО ТЕПТИ...»
– Экинчи жолу боюма бүтүп калды. Кайним баягы тумарды көрүп ичин ачып окуп, “сени окутуп алган” деп агасынын көңүлүн буза баштады. Кийин Оштон “эжеси катуу ооруп жатат” деген кабар келди. Алишер “экөөбүзгө жол киреге жетпей калат, сен 1-2 ай жашай тур, мен келип калам” деп коштошуп, Ошко сапар алды. Агам “акчаң жетпей жатса, менден сурабайсыңбы, сен күйөөңдүн жанында болушуң керек” деп учакка билет алып берди.
Кайнежемдин каза болуп калганын угуп, апам экөөбүз куран окутканы жөнөдүк. Катуу өкүрүктөн кызым чочуп ыйлап, мен бала менен алек болуп отуруп калдым. Кайнежелерим “эмнеге биз менен учурашып, ыйлабайт?!” деп апама асыла башташты. Мен оокат менен алек болуп, ары-бери чуркап жүрдүм. Бир маалда Алишер келип, “сен баланы алып үйүңө бара бер” деди. Кетип баратканыбызда кайнежем менен Алишер келип колума кагаз карматышты. Анда “3 талак бердим” деп жазылыптыр. Жамандыкта ызы-чуу кылбайын деп кете бердим. Бирок Алишер бир айдан бери телефонго жооп бербей, дайынын билдирбей, жолугушуудан качып жүрөт.
Тааныштар аркылуу 15-мартта үйлөнөрүн уктум. Туугандарым, ата-энем телефон чалса да сүйлөшпөй, Алишерди жашырып жатышат. Азыр 8 айлык балам боюмда, колумда 2 жаштагы кызым бар. Барбаган, издебеген жерим калбады. Акыркы жолу Алишер “мен эле таштап жатыптырмынбы, элдин баары эле ушинтип жүрөт” деп айтты. Тууган-уругум “өзүң тийгенсиң” деп, ортодо мен жарга такалдым.
Алишер, эки балаңды жетим калтырба, жок дегенде ачык сүйлөшүп, күнөөм болсо, бетиме айт. Сени таппаганымдан гезит аркылуу ушул сөздөрдү айтууга мажбур болдум. Балким, сага чыга турган кыз мен тууралуу билбейт, андыктан кеч болуп кала электе ал дагы ойлонор.

Нурила
Биз Алишерди күнөөлөгөндөн алыспыз. Бирок жардам сурап кайрылган кош бойлуу айымдын суранычынан баш тарта алган жокпуз. Бул окуя бир тараптуу болбош үчүн Алишердин, агасынын телефон номерине чалдык, бирок байланыша албадык.

Мальвина Уметбекова
koom@super.kg