Сахна көркү, экран жүзү болгон жылдыздар көрөрмандар, күйөрмандардын алдына ар дайым сулуу болуп чыгышат. Аларды көрүп "ырчы же актриса болуп кетсемби, татынакай болуп жасанып эле жүрөсүң" деп тамшангандар көп. Ошол жылдыздар сиз көргөн сулуу деңгээлге чейин кандай болушкан?..

ИЛЬЯЗ АБДЫРАЗАКОВ, ЫРЧЫ:

– Ильяз Абдыразаков деп 2006-жылдан тартып чыга баштагам. Мурун ырчылар сахнага атайын кийим тиктирчү эмес беле. Форманы кийгенде аябай толкундангам. Бир жагынан кубансам, бир жагынан "өмүр бою ушинтип форма кийип өтөмбү?" деп капа да болуп кеткем. Анан да биринчи жолу концерт койгонумда чачымды жасатканыма күлкүм келген, улам "ушинтип өмүр бою сахнага чыккан сайын чачымды жасата беремби?" деп. Эми болсо чачымды деле жасатпай калдым, чоңойбодукпу.

НУРЗАТ ТОКТОСУНОВА, ТЕЛЕАЛПАРУУЧУ:

– Алгач 2005-жылы "Хит-парадга" чыккам. Ал жаштар берүүсү болгондуктан, жынсы, спорттук кийимдерди кийүүнү талап кылышчу. Жумушка өзүм да кызыккандыктан, чач жасалга, макияжды акыркы акчама болсо да жасаткан күндөр болгон.
Салондорго дайым барып тургандыктан, кээде акчам жок болуп калса, карызга жасап беришчү. Колума тийген акча ошондой иштерге кетчү.

НАЗИРА АЙТБЕКОВА, АЛПАРУУЧУ:

– Мен эл алдына чыкканыма 7-8 жылдын жүзү болуп калды. Алгач Алексей Филатов экөөбүз "Хит-парадга" чыкканбыз. Динара эже экөөбүз тартылган видеону кийин көрсөтүп жатпайбы. Ошондо өзүмдү көрүп маанайым абдан чөккөн. Анан да биринчи эфир бүткөндө Динара эжеге көрөрмандар чалып, "эмне мынча түрү суук кызды алып алгансыңар?" деп айтышканы эсимден кетпейт. Салонго деле барган болчумун, ал жактан да адистер чарчашканбы, айтор, эптеп эле боёп коюшса керек.
Апам айлыгынын көбүн мага сарптачу эле. Экөөбүз кечке базар кыдырып, мага кийим издечүбүз. Күйөөгө чыккандан кийин жолдошум салондорго алпарып, бийге, моделдик агенттикке жаздырып, азыркы деңгээлге жеттим.

АРСЕН, ЫРЧЫ:

– Алгач сахнага 2009-жылы кадам шилтегем. Кан башка тээп турган чакта өтө ачык түстөгү, жалтырак кийимдерди стилдүү деп ойлочумун. Арадан үч эле жыл өтсө да, ошол сүрөттөрүмдү азыр көрүп күлүп калам.
Арык болчумун, көп кийимдер чоң келип калгандыктан, көбүнчө жабышкан кийимдерди кийчүмүн. Арык кишини ал нерсе андан беш бетер арык көрсөтө турганын мен кайдан билейин?.. Эми болсо өзүмө өзүм сынчымын, стилимди да өзүм тандайм. Учурда ретро кийимдерге басым жасап, бир түстүү кийимдерди кие баштадым. Чаар ала, ар түрдүү түстөрдү кийбейм.

ЗАМИР МЫРЗА, ЫРЧЫ:

– Мен 2001-жылдан баштап чоң сахнага чыккам. Ал кезде Мурат Насыров, "А-Студио" тобу укмуш популярдуу эле. Ошолорго таасирленип чачты да өстүрдүк, клёш шымдарды кийдик.
Мурун азыркыдай бренд болгон, фирмалык кийимдер аз жана кымбат болчу. Шартка ылайыктап, анын фасондорун уурдап тиктирип алып кийип жүрдүк. Алгач сахна кийимин кийгенде аябай эле толкундангам. Анткени бизде жоопкерчилик көп да. Ар кандай адамдар болот, ар биринин көңүлүн алсам дейсиң. Азыр эми замандын талабына жараша клёштон ичке шымдарга өтүп, чачты кыскарта баштадык.

ЭЛИНА АБАЙ КЫЗЫ, АКТРИСА:

– Тасмага 16 жашымда тартылгам. Ал кезде көйнөк, шиш така, маникюр, педикюр, салонго баруу деген ой түшкө кирчү эмес. Бул нерселерге эми гана аралашып калбадымбы. Кээде отуруп күлүп калабыз, "экранга чыкпасак, боёнбой, көйнөк дегенди деле унутуп калсак керек" деп. Азыр ошол сүрөттөрүмдү көрүп, "апей, мен ушундай кыз белем?" деп күлүп калам.

Гүлжамал Бөрүкулова
star@super.kg