Өзүн эркекмин деп эсептеген ар бир мырзада “айымдар менен кантип мамиле куруу керек? Сулуу бийкеч менен кантип таанышып, ага жагуу керек? Кантип мамилени болушунча тез төшөккө жеткирсем?..” деген ойлор жашайт. Бирок арабызда сулуу бийкечтин жанына басып барууга эрки жетпегендер жок эмес. Бул макала мына ошондой “ботаник” же уялчаак мырзалар үчүн даярдалды. Казанова, катынпоз, Дон Жуан дегендердин баары эскирип бүткөн. Азыр модада жаңы замандын профессионал мачолору – пикаперлер. Пикаперлердин ыкмаларын мен – Эркин Сексенбаев иликтеп, ой бөлүшүүнү туура көрдүм.

Ар бир эркектин көздөгөн максаты ар башка. Кимдир бирөө көбүрөөк сексти кааласа, башкаларына элитанын кыздары керек. Айрымдар 1 өнөктөш менен узак убакыт туруктуу мамиледе болсо, кээ бирлерге өнөктөштөрдү тез-тез алмаштырып туруу жагат. Ошол максаттарга жетүүдө амбициясы күч жигиттерге пикап жардам бере алат. Пикап Кыргызстанга баягы эле батыштан келген түшүнүк. Азырынча бизде пикап мектеби жок. Андыктан макаладагы кеңештер өнүккөн өлкөлөрдөгү стандарттар боюнча берилди жана биздин менталитетке жатпай калышы мүмкүн. Пикаптын жайылышына бөгөт коё албасак да, кабардар болуп койгонубуз оң. Алгач ал жөнүндө жалпы түшүнүк алып, анан убакытты созбой кеңештерге өтөлү. Анткени эшикте жайнаган кыздар-кызгалдактар күтүп жатышат...

ИЧ КИЙИМ ҮЧҮН КҮРӨШ
“Пикап” – англисчеден которгондо “таанышуу” дегенди билдирет. Бул – эркектин айымдарга жагынуу үчүн колдонгон куралы. Пикап бул – жөнөкөй тил менен айтканда, айымдарды кумарландыруу, азгыруу. Айымдардын ич кийими үчүн күрөш.
Пикап АКШда өткөн кылымдын 70-жылдарында жаралган. 90-жылдарга барып, пикап боюнча курстар ачылып, миллион топтогондор да болуптур. Интернеттин пайда болушу менен “илибой” айымды кайырмакка илген легендарлуу пикаперлер тууралуу аңыз кеп бүт дүйнөгө жайылып отурат. Пикаптын чебери же пикапер – жогоруда айтылган куралды колдоно билген адам.
Идеалдуу пикапер – коңур үндүү, стилдүү кийинген, тамашакөй, амбициясы күч, эч нерседен тайманбаган эр жүрөк мырза. Айымдардын көңүлүн тапканды, максатына кантип жетүүнү так билет.

БАКЫТ ИЗДЕГЕНИ ДА БОЛОТ
Пикаперлер төмөнкүдөй түрлөрү бар:

1. Жар издегендер – айымдарды төшөгүнөн өткөрүп, идеалдуу аял издегендер.
2. Спортчулар – статистика үчүн иштегендер.
3. Иликтөөчүлөр – пикап менен кызыгуудан улам гана алектенгендер.
4. Акылмандар – пикапты жашоонун маңызы деп эсептегендер. Алар үчүн айымдардын саны экинчи планда калып, азгыруу процессине көңүл бурушат. Акылмандар үчүн сулуу бийкечтин өзү эмес, кезектеги бийкечти торго кантип илүү маанилүү.

Чынында, сулуу кыздын алдына мастар эле басып барбаса, көпчүлүк жигиттер даай албайт. Түбөлүк бала бойдон калбай, жашоонун даамын татуу үчүн машыгуу керек. Ооба, бардык жактагыдай эле пикапта да кадимкидей машыгуу чоң роль ойнойт. Күнүнө ондогон бийкечтер менен тааныша берүү керек. Убакыт өткөн сайын профессионал болуп каласың. Кантип таанышуу керек дейсизби?..

ТААНЫШУУДА ЭМНЕ МААНИЛҮҮ?
Сиз кыз менен таанышууну кандай элестетесиз? Сиздин аппак “крутой” машинаңыз бар, сиз ак боз атчан ханзаадасыз жана сиз менен баары таанышкысы келет. Же сиз Жеймс Бонд сыяктуу тик учмадан секирип, бир бийкечти куткарып калдыңыз. Ал сизге өзү эле багынып берет. Жок, андай болбойт. Андай китептерде же кинодо гана болушу мүмкүн.
“Кымбат баалуу автоунаа сатып алам, анан көрөсүңөр, кыздар меники болот” дегендер жаңылышат. Иш жүзүндө машина эч нерсени чечпейт. Же болбосо “залга барып машыгып, денемди сулуу кылсам, кыздар өздөрү тартылат мага” дегендер да убактысын бекер кетиришет. Айымдар үчүн кымбат баалуу машина же булчуңдар маанилүү эмес. Айымдар менен таанышып, баарлашууда жөнөкөй, өзүнө ишенген мырза болуш керек.

КЫЗДАР САТЫЛБАЙТ!
Азгыруунун иштелип чыккан стандарттык моделин карап көрөлү. Демек, кызды кайырмакка илүү, төшөккө көндүрүү үчүн төмөнкүлөр керек:

1. Табуу
2. Көңүлүн буруу
3. Байланышуу
4. Кызыктыруу
5. Ишенимине кирүү
6. Жакындашуу
7. Кумарга батуу
8. Мамиле куруу

Өзүңүз байкагандай, тизмеде ойлонуу же чечим чыгаруу деген жок. Ошондой эле жогорудагы моделде кызга гүл же белек берүү, ресторанга алып баруу, көңүлүн ачуу дегендер жок. Эмнеге? Анткени канчалык аракет кылба, кызды эч качан сатып алуу мүмкүн эмес! Башкысы, кызды инсандык сапаттарың менен кызыктырып алышың керек.
Эгер сен кызды ресторанга чакырып, ал үчүн төлөсөң, көңүлүн ачсаң, анда сен ага байланып каласың. Ал сени курсагын тойгузуш үчүн колдонуп калат. Айым эркек менен байланыша баштаганда (№3) дароо текшерет, “ушул эркекти байлап алсам болобу?” деп. Эгер болсо, анда сенин күнүңдүн бүткөнү. Эгер эркек “дрессировкага” моюн бербесе, анда айымга ал эркек өзгөчө болуп көрүнөт. Айымдын мээсинде бизге керек болгон инстинкт – “ушул эркектен тукум алып калуу” иштей баштайт. Анын сага кызыгуусу ойгонот (№4). Анын артынан сен эмес, ал сенин артыңдан чуркай баштайт.

АЯЛЗАТЫ АКЫРКЫ МҮНӨТТӨРГӨ ЧЕЙИН КҮМӨН САНАЙ БЕРЕТ
Жогорудагы этаптардын биринен экинчисине туура жана өз убагында өтүү маанилүү. Дагы бир маанилүү нерсе, эркек менен айымдын ортосунда чыныгы мамиле секстен кийин гана башталат. Айым сендик экенине толук ишенип, күмөн саноосу качан сен ага “киргенде” гана токтойт. Айымдар кээде акыркы учурда оюн өзгөртүп жибериши мүмкүн. Эми кумарга батарда төшөктө жатып “мүмкүн, токтотобуз?..” десе таң калбаңыз. Алардын табияты ошондой. Бул алар издеген мырза чын эле сизби же сиз эмеспи, текшерип жаткандагысы. Айтор, аялзаты акыркы мүнөттөргө чейин күмөн санай берет. Албетте, мындайда чечкиндүү болуу талап кылынат.

ЖИГИТТЕР, ЭСИҢЕРДЕ БОЛСУН!
Таанышпаган кыз болбойт, тааныша албаган эркек болот. Көнбөгөн кыз болбойт, көндүрө албаган эркек болот. Жигиттер, айымдар үчүн күрөштө жеңилип калбаш үчүн тапкыч болгула. Кептин соңунда 1 мисал, өзүнө ишенген жигит барга кирип, татынакай айымдын жанынан орун алат. Айымды бир тиктеп, колундагы саатын карай баштайт. Аны байкаган бийкеч:
– Айымыңыз кечигип жатабы?
– Жок, ай. Бүгүн мобул өзгөчө саатты сатып алдым эле. Ошону сыноодон өткөрүп жатам.
Кызыгып калган кыз:
– Өзгөчө саат?.. Мунун эмнеси өзгөчө экен?
– Альфа нурларынын жардамы менен адамдар тууралуу маалымат бере алат. Мисалы, саатым сиздин ич кийимиңиз жок экенин айтып жатат.
– Ха-ха!.. Саатыңыз бузук экен. Менин ич кийимим бар.
Анда жигит саатын бурап:
– Аа, анда шашып 1 саат алдыга озуп кеткен го...

Эркин Сексенбаев
kenesh@super.kg

«Супердин» сурак бурчу

КЫЗДАРДЫ КАЙЫРМАККА ИЛҮҮДӨ КАНДАЙ КУРАЛ КОЛДОНОСУЗ?

Асылбек Өзүбеков, актёр:
– Биздин учурда азыркыдай телефон деген түшүнүк жок болчу. Биз кыздарды кат жазуу менен кайырмакка илип алчубуз. Азыркы муундун жаштарындай эмес, маданияттуу болчубуз. Көчөдө баратканда “чоң кы-ыз” деп сылык сөздөрдү сүйлөп же ышкырып “колго түшүрчүбүз”.

Арсен Эралиев, балбан: – Кызды карамагыма өткөрүү үчүн уюлдук телефондун кызматынан пайдаланам. Тил кыска да, дароо барып сөз айта албайм. Ошон үчүн тааныштарды ортого салып, алгач кыздын телефон номерин таап алам. Телефондон сүйлөшүп, жоошутуп алган соң гана кайырмакка илүү аракети көрүлө баштайт.

Султан Садыралиев, ырчы:
– Өзгөчө деле кайырмак колдончу эмесмин. Келинчегимди кайырмакка илүүдөгү ыкмаларымдан айтсам, жасоого мүмкүн болбогон кадамдарга барчумун. Мисалы, Орусияга гастролдоп барып, эртеси аны менен жолугуу үчүн Бишкекке учуп келе берген күндөр болгон.

Бакыт Байсариев, шоумен: – Эң негизгиси, өзүң “ничёшка” болушуң керек. Бойдок кезде “мощный” ыкмаларым бар эле. Үйлөнгөнүмө байланыштуу сүрөтчү досумдун ыкмаларын айтып берейин. Ал “тойлордо кыздарга кайрылып, “чоң кыз, мага жагып калдыңыз, тойдон кийин узатып коёюн” десем, 95 пайызы макул болот” дейт.

Ильяз Андаш, ырчы:
– Кыздарды кайырмакка илүүдө эркектин биринчи куралы – көзү. Кызды кайырмакка илиш керек болсо, көз караш менен баам салыш керек. Анан жанына барып бир нерсе тартуулап, сөздөн-сөзгө өтүп эле илип аласың го. Негизи, менин сөз байлыгым жакшы эле, сөз менен деле илип алам.

Кубат Кубанычбеков, «тамашоучу»: – Кыздарды кайырмакка илүүдө бир курал менен чектелген болбойт. Ар кимге ар кандай кайырмак саласың. Мисалы, “чоң кыз, сиздин ата-энеңиз террорчу болсо керек, ээ?” десем, “эмнеге?” дейт. “Анткени сиз “бомба” экенсиз” деп тамашалап жатып торго түшүрүп алчумун.

Санжар Бердибеков, куудул:
– Түз эле барып “жаным, кандайсың?” деп сөзгө тартып кетчүмүн. Албетте, бардык кыздарды эмес, өзү биринчи мени карагандарын гана. Ал эми карабагандарынын маанайын байкап иш кылыш керек. Негизи тамашалуу кептер кайырмак болуп бере алат.

Уулбү Каныбекова