1-майда Кайрат Нуртастын Спорт Ордосунда өткөн концертинде ырчыны бир көрүүгө ашык болгон кыздар арбын экенине ынандык. Сахна гүлгө толуп, кыздардын үнү залды дүң түшүрүп жатты. Ишенимдүү булактардан Кайраттын бир концерт үчүн гонорары миллион теңге экенин укканбыз. Бул жигиттин сахна артында анча-мынча "каприз" көрсөтөрүн да билебиз. Бирок ошолордун баарын ал сахнага чыкканда 100 пайызга жууп саларына күбө болдук. Бишкектеги концертинде Кайрат алган гонорарын 100 эмес, 150 пайызга актап кетти көрүнөт. Айтор, келген эл короткон акчасына ыраазы болуп кайтты. Биз болсо, үч сааттык концерттен соң чарчап бутунда араң турган Кайратты кепке тарттык.Аты-жөнү – Айдарбеков Кайрат Нуртас уулу

Туулган жери – Казакстандын Түркстан шаары
Туулган жылы – 1989-жыл, 25-февраль
Үй-бүлөдө – 3 бир туугандын улуусу
Бою – 175 см, салмагы – 59 кг
Ырынын саны – 90-100
Ыр жыйнагынын саны – 7
Хоббиси – Бильярд ойноо
Жактырган түсү – Ак, кара
Жашоодо баалаганы – Апасы
Кумири – Шакрукх Кхан
Кыздарда жактырганы – Калп айтпаган, ачык, жөнөкөй кыздар жагат

– Кайрат, кандайсың? Концерт сен күткөндөй болдубу?
– Мага аябай жакты, элден мынчалык колдоону күткөн эмесмин. Кыргыз элине келип отурганыма кубанычтамын жана ыраазымын. Негизи эле бүгүнкү кеч керемет өттү.

– Күйөрмандарыңа үй-бүлөң тууралуу кыскача баян этсең...
– Эки иним бар. Бирөө футболчу, экинчиси боксчу. Атам жеке ишкер, апам менин продюсерим.

– Бала чагыңдан эле ырчы болууну эңсечү белең?
– Кичинемден эки кыялым бар. Ырчы жана президент болуу. Ырчылыкка жеттим. Балким, келечекте президент да болуп калармын.

– Биринчи кыялыңа кантип жеттиң?
– Ырчы болуу оңой эмес, 10 жашымдан бери сахнадамын. Анда жаш болгондугумдан аракет кылып ыр жазсам да окшочу эмес. Кийин “Арманды” ырдап чыкканда гана атактуулукка жеттим.

– Атактын башаты “Арман” кандайча жаралып калган?
– Досум "атактуу ырчы болом" деген кыялымды билип “ырлары көп, барып көрсөң” деп бирөөлөргө жиберди. Барсам, алар өздөрү ырчы жигиттер экен. Көп ырларды ырдайт, бирок “Арманды” жактырышпай ырдабай жатышыптыр. Сурасам, авторуна кайрылышым керектигин айтышты. Ал кишинин да “сен жашсың. Сага кайдагы махабат ыры?” деп баласынтканына карабай сурай бердим. Жыйынтыгында ырды сатып алмай болдум. Атамдан акча сурасам, жини келип, аябай урушту. Ырчы болорума анда атамдын көзү жетпесе да мени кыя албай, “акыркы жолу жаздыр. Мындан кийин ырга акча бербейм” деди. Ошентип, ырды жаздырдык. Күндө жатарда “эл укса экен, ушул ырым хит болсо экен” деп тилей бердим. “Арман” бир айдын ичинде хит болуп кетти. Ошондо гана атам менин ырчы боло аларыма ишенди да, өзү да жардамдаша баштады.

– Ырчылык оңой-олтоң иш эмес экенин өзүң айтып өттүң. Кыйынчылыктар көп болгондур...
– Башында ырымды эл угабы деп сарсанаа болосуң. Материалдык жактан кыйынчылыктар болот. Мунун баарынан өттүм, азыр Казакстанда мени концертти эң көп койгон артист деп айтышат. Бир жылда 100-200 концерт берем. Мен эринбейм, чарчабайм, тажабайм, анткени ошол элдин батасы менен жашап жатам да. Ушул жерден бир мисал келтире кетейин. Жакында Казакстандан Кытайга кетип баратып жол кырсыгына кабылдым. Учакка кечигип калгандыктан, машина менен шашып бараткам. Бир маалда машинабыз алты ирет оодарылып кетти. Аман калдым, эч жерим сынган жок. Ушунун баары калктын батасынан улам деп ойлойм.

– Сахна сен үчүн?
– Сахна – менин жүрөгүм. Сахнаны сыйлаш керек.

– Алгач Кайрат Айдарбеков болуп сахнага аттангансың. Эмне себептен фамилияңды өзгөрттүң?
– Айдарбеков Кайрат деген узун, кулакка жагымсыз. Кайрат Нуртас дегенди кичинекей бала да бат эле жаттап калат. Нуртас – атамдын аты. Атам да өз кезегинде ырчы болгондуктан, анын аты өчпөсүн деп Нуртас аталып алгам.

– Азыр жаштар интернетте, социалдык сайттарда "жашашат". Сенчи?
– Интернет деген нерсе мага жакпайт, кирбейм. Ал адамды жакшылыкка алпарбайт. Түнү менен сүйлөшүп отура беришет. Бул өмүрдүн бекер өтүп жатканы да. Андан көрө башка пайдалуу иштер менен алек болушса...

– Дал ошол сен жаман көргөн интернет булактарындагы маалыматка таянсак, аялың, 3 балаң бар экен...
– Ал сыр. Аны айтпайм.

– “Саз алеми” сынагынан калыстар төмөн баа берсе да, элдин добушу менен утуп кетип, "Жылдын ыры" наамын алдың. Буга кандай комментарий бере аласың?
– Калыстар өз баасын берди. Калк сени сүйсө, калыстарга да карабайт. Негизи, ал жакта бир адам эки наамды алганы сынактын тарыхында болгон эмес. Мен “Эң мыкты ырчы мырза”, “Эң мыкты хит ыр” деген наамдарга татыдым.

– Гонорарың кандай? Бир концерттен канча акча табасың?
– Ар кандай болуп калат. Аны продюсерим билет. Бирок өзүм 6-7 миң доллар деп угуп калгам.

– Азыр атагың таш жарып турган маал. Концерттерге чакырышса, талабың катуубу?
– Мага суу менен күзгү болсо болду. Чачымды суулап туруп, күзгүгө каранып алып чыга берем.

– Жакында эле Семей шаарында пландалган концертиң болбой калып, күйөрмандарың плакаттарыңды өрттөп, сага нааразы болуп жатышты...
– Биз уюштуруучулар менен бир эле күн концерт болот деп келишкенбиз. Алар эки күн болот деп элди топтоп алышкан экен. Келишим башкача болгондон кийин мен кетип калгам. Ал эми телеканалдар учурдан пайдаланып өздөрүнө рейтинг жыйнаш үчүн мага атайылап эле кара пиар кылышты. Алар атайын элди топтоп, мага нааразычылык айттырышты, мен тим эле Саддам Хусейн болгонсуп.

– Жылдыз оорусу менен таанышсыңбы?
– Ашынган жылдыз эмесмин. Бирок кээде болот. Досторум чалып алып “жылдыз болуп кетипсиң. Чалбайсың, кабарлашпайсың” дешет. Ооба, мурда чалып турчумун. Анда го жумуштарым азыраак болчу. Азыр көбөйдү. Ырчылык кандай адамды болсо да өзгөртөт экен.

– Спортко ар бир эркек кызыкса керек...
– Он жыл мурда таэквандого баргам. Бул спорт түрү боюнча кара курдун ээсимин. Бирок азыр ыр менен гана алекмин.

– Маегиңе рахмат! Чыгармачылыгың өсө берсин!

Перизат Музуратбекова
star@super.kg