29-апрелде Тайванда (Кытай) күрөш боюнча "Лондон-2012" Олимпиадасына жолдомо ойнотулуучу кезектеги мелдеш соңуна чыкты. Тилекке каршы, балбандарыбызды бул жолу да ийгилик жылоологон жок. Грек-рим күрөшү, эркин күрөш жана кыздар арасындагы эркин күрөш боюнча аттанган калың топ болгону бир жолдомону бетке жамынып кайтты. Бул жолдомо эркин күрөш боюнча 96 килограмм салмакта Могамед Мусаевге (сүрөттө) таандык. Эске салсак, кийинки мелдеш 2-6-май аралыгында Финляндияда өтөт. Ал мелдеш балбандар үчүн 2012-жылкы Олимпиада оюндарына жолдомо ойнотулуучу эң акыркы мелдеш болгондуктан, аларга ойгонууну сунуштайт элек. Ансыз да “Казакстанда жана Кытайда удаа өткөн мелдештерде жолдомо утпаган кыкеңдер эми утмак беле...” дешүүдө. Эмне дейбиз, күтө туралы. “Тирүүдөн түңүлбө” дейт эмеспи... Азырынча 7 гана жолдомо болгонун кошумчалайбыз :(