Нарын

Ырчы-чоорчулардын көпчүлүгү айылдарга концерт коюп келишсе, “айылдыктарга боло берет “ деген мамиле кылышат деп нааразы нарындыктар.
29-апрелде Нарын драма театрында Бекбоевдердин үй-бүлөсү “Алдыңарда үй-бүлө, абайлап эми күлгүлө” аттуу концерт беришкен. Эки жылдан бери Нарынга келе элек Бекбоевдерден катуу даярдыктагы концертти күтүп отурган эл сахна ачылары менен бир “у-уу” деп алышкан. Жасалгаланбаган сахнаны көрүп, "мейли, эми башкысы, концерт көңүлдүү өтсө экен" деп күткөн элдин ишеничи акталбаптыр. Жаңыл эже индия бийин бийлеп ары-бери тоголонуп, Токтор байкебиз бирөөнү чыгарып, далай жолу айтыла берип кызыгы кеткен тамашасы "Глобусту" аткарып, Бегимай болсо эки жаңы ырын ырдаганы концерттин негизин түздү деп Нарын эли нааразы. Буга чейин дал ушундай типтеги концертти Тата Улан марттын башында бергенин кошумчалай кетишти. "Нарынга жөн эле акча тапканы келишкенби, айтор, эмнеси болсо да ырчылар айылдыктарга боло берет дебей, жакшы даярдыкта келишсин!"- дейт жергиликтүү эл.