Кара-Суу районуна караштуу Шарк айылындагы бир үйдөн колго жасалган саат механизми менен жарылгыч курал, атуучу курал жана ок-дары табылды. Ош ШИИБинин маалымат кызматынын жетекчиси Замир Сыдыковдун билдиришинче, 30-апрелде милицияга "диний-экстремисттик агымдын активдүү мүчөсү, Ош окуясы боюнча издөөдө жүргөн 1984-жылы туулган Элмурат Ормонов аттуу Шарк айылынын тургуну үйүндө жашынып жатат" деген оперативдүү маалымат түшкөн. Санкция алынып, Ормоновдун үйүн тинтүү учурунда милиция кызматкерлери тамдын чатырынан колго жасалган саат механизми менен жарылуучу куралды табышкан. Мындан сырткары РГД-5 гранатасы тутандыргычы менен, Калашников автоматынын стволунун астына бекитилүүчү гранатамёт, Калашников автоматынын 30 огу бар магазини, 5,45 миллиметрлүү 78 ок, 7,68 миллиметрлүү 7 ок да табылган. Тергөө бөлүмү Кылмыш жана жаза кодексинин 241-беренеси (ок атылуучу, ок ат поочу куралдарды, ок-дарыларды, жарылуучу заттарды жана жарылуучу жасалгаларды мыйзамсыз сатып алуу, берүү, сатып-өткөрүү, сактоо, ташуу же алып жүрүү) менен кылмыш иши козголгон. Учурда үй ээси О.Эни кармоо жана анын башка да кылмыштарга тийиштиги бар экендиги, ок-дарыны кайдан алгандыгы тууралуу иш-чаралар жүрүп жатат.

Нурбек Абдыкадыров