– Максат, байгеңиз кут болсун! Белегиңизди редакциядан иниңиз алып кетти эле, жактыбы сизге?
– Жакпагандачы?! Досумдан берип жибериптир. Ал Бишкектен чыккандан эле «сонун эт туурагыч уткан турбайсыңбы, оригинал экен» деп телефон чалып куттуктаган. Белегимди болочоктогу жубайыма деп катып койдум. Сиздерге чоң рахмат! Казынаңыздар бөксөрбөй, окурмандарыңыздар үчүн мындай оюндардын далайын уюштура бериңиздер. Биз, окурмандар, ар дайым сиздер менен биргебиз!

– Суроолорго жооп табуу кыйынга турган жокпу?
– «Супер-Инфону» алгачкы сандарынан бери окуп, чогултуп келе жатам, жоопторду оңой эле таптым. Мурун атайын райондун борборуна барып сатып алчу элем. Азыр почтага жазылып койгом. Жума, ишемби күндөрү өздөрү таратып кетишет. Мурдагыдай жетпей калам деп сарсанаа болбой калдым. Ар кандай жаңы рубрикалар кошулуп, гезиттин күндөн-күнгө кызыгы артып баратканы мени сүйүндүрөт. Учурдан пайдаланып сүйүктүү гезитим «Супер-Инфого», анын жамаатына албан-албан ийгиликтерди каалайм. Массалык маалымат каражаттарынын көч башында болуп, алдыга карай адымдай бергиле! Силерге ошол гана жарашат!